Denuncian que o alcalde de Vilardevós pagou unha dedicación exclusiva de 9 meses "por non facer nada"

O PSOE de Vilardevós denuncia que o alcalde da localidade, Manuel Cardoso, pagou unha dedicación exclusiva a unha edil do PP durante nove meses "por non facer absolutamente nada". O portavoz municipal socialista, Julio Prada, fala de feitos "caciquís e decimonónicos" e asegura que queda "claro" que "hai quen vén á política unicamente polo diñeiro".

A concelleira Belén Rigüela pasou de cobrar "por non facer nada", apunta Prada, a cobrar "por facer un traballo impropio", xa que "son funcións propias de empregados públicos". "Con esta manobra, os populares evidencian que só miran polos seus intereses económicos e non polos de todos os veciños", advirte o socialista.

Nun decreto asinado polo rexedor o pasado 5 de agosto, segundo o PSOE, Cardoso recoñece que "certamente naquel acordo" do 3 de decembro do ano pasado "non se estableceu nin se concretaron as competencias e facultades a desenvolver pola concelleira, que pasaba a desempeñar o seu cargo en réxime de dedicación exclusiva".

O primeiro edil "faculta agora á concelleira para acceder ás aplicacións informáticas de xestión municipal, así como ás plataformas da Xunta e da administración xeral do estado por medio das que o concello se relaciona con esas administracións", engade. "Vai exercer funcións puramente administrativas sendo un cargo político", censura.

Casa do Concello en Vilardevós | Fonte: Wikipedia