Aumentan os contaxios de COVID con máis de 600 novos casos en Galicia mentres baixa a presión en UCI
Este incremento no número de novos casos ten a súa orixe no crecemento dos contaxios nas áreas sanitarias de Vigo, Ferrol e A Coruña; mentres que, no resto de áreas, os novos contagios son inferiores en número aos confirmados o mércores. O xerente do Sergas admite "non estar satisfeito" coa ocupación en UCI, a pesar da "melloría" da situación.
Por Europa Press / Redacción | SANTIAGO DE COMPOSTELA | 19/08/2021 | Actualizada ás 11:52
As cifras de evolución da pandemia de Covid feitas públicas este xoves pola Consellería de Sanidade ratifican que segue á alza o número de novos contagios, con 613 novos casos confirmados da infección en Galicia, aínda que o número de casos activos continúa baixando no cómputo global e redúcese tamén a presión nas Unidades de Coidados Intensivos, con tres pacientes menos.
Segundo os datos notificados polo Sergas (con información solicitada ata as 18,00 horas deste mércores), nas últimas 24 horas confirmáronse 613 novos contagios, 16 novos contaxios máis que os rexistrados a xornada anterior; mentres que o número total de casos activos baixou ata os 12.119, o que supón 611 menos que os notificados o mércores.
Este incremento no número de novos casos ten a súa orixe no crecemento dos contaxios nas áreas sanitarias de Vigo, Ferrol e A Coruña; mentres que, no resto de áreas, os novos contagios son inferiores en número aos confirmados o mércores.
No caso de Vigo, confirmáronse 159 contaxiados novos nas últimas horas (son 16 máis que na xornada anterior), en Ferrol notificáronse 57 contagios novos (20 máis que o mércores), e na Coruña os novos casos confirmados foron 173 (34 novos contagios máis).
No conxunto de Galicia rexistráronse mediante probas diagnósticas 604 casos positivos nas últimas 24 horas (que poden corresponder a casos activos doutras xornadas aos que se realiza unha nova proba).
Con respecto aos casos activos por áreas, descenderon en todas elas. Así, a da Coruña segue á cabeza no número de persoas que padecen Covid, con 3.840 casos (189 menos); seguida por Vigo, con 2.985 casos (149 menos). Na área de Lugo hai 1.287 casos activos (57 menos); na de Pontevedra hai 1.211 casos (84 menos); na área de Santiago hai 1.203 casos (56 menos); na Ferrol hai 853 casos (25 menos); e na Ourense hai 740 casos (51 menos).
PRESIÓN HOSPITALARIA
A pesar do incremento de novos contagios, a presión nas Unidades de Coidados Intensivos reduciuse levemente nas últimas horas, con 3 pacientes menos (quedan 60 persoas en coidados críticos). No entanto, o número de pacientes ingresados en unidades convencionais de hospitalización, en 'planta', subiu de 259 a 264.
A área da Coruña é a que ten máis pacientes con Covid na UCI, un total de 18 (aínda que son tres menos que hai un día); en Ferrol os pacientes críticos subiron a 11 (+1); en Vigo a UCI mantéñense sen cambios, con 10 ingresados. Na área de Lugo hai 6 pacientes en UCI (un menos), os mesmos que na área de Ourense (sen cambios); en Santiago seguen en UCI 5 persoas; e en Pontevedra permanecen en UCI 4 pacientes con Covid.
O xerente do Servizo Galego de Saúde (Sergas), José Flores Arias, insistiu na "melloría" da situación epidemiolóxica, pero recoñeceu "non estar satisfeito" coa ocupación hospitalaria, nomeadamente coas cifras de pacientes en UCI.
"É certo que estamos mellor que ao principio, pero segue habendo pacientes en UCI, 63, que foron en aumento ata agora. Esperemos que esa tendencia empece a estabilizarse", apuntou para insistir en que a poboación debe ser consciente da situación.
CURADOS, FALECIDOS E PROBAS DIAGNÓSTICAS
Desde o inicio da pandemia, superaron o Covid en Galicia 158.011 persoas, das que 1.219 recibiron o alta epidemiolóxica nas últimas horas.
Por contra, faleceron 2.529 persoas. Os últimos decesos comunicados por Sanidade son os dunha muller de 85 anos de idade que morreu na residencia de maiores de Ribadeo; un home de 88 anos que estaba ingresado en Povisa; outro home de 83 anos que faleceu no hospital de Verín e que procedía da residencia Val de Monterrei; un home de 93 que estaba ingresado no Hospital de Monforte; e unha muller de 89 anos de idade, que estaba no Hospital de Burela.
Con respecto ás probas de detección do virus, realizáronse ata agora 2,68 millóns de probas PCR (6.267 nas últimas 24 horas), máis de 755.000 probas de antíxenos (3.139 nas últimas 24 horas) e máis dun millón doutro tipo de probas diagnósticas.
En canto á positividade das probas PCR, segundo a información trasladada este xoves polo Sergas, nas últimas horas detectáronse 9,9 infeccións por cada 100 probas. A OMS fixa o limiar no 5 % para considerar controlada a pandemia.
