Os albergues aumentan a capacidade mentres Xunta e hostaleiros estudan ampliar a de bares e restaurantes

A Xunta de Galicia ampliou ao 50% a capacidade da rede de albergues do Camiño de Santiago, tanto dos públicos como dos privados, "para acoller con seguridade os peregrinos que percorren as rutas xacobeas". Así o informou a Vicepresidencia primeira e Consellería de Presidencia, Turismo e Xustiza, que sinalou ademais que a medida se publicará este venres no Diario Oficial de Galicia (DOG) e entrará en vigor ás 00,00 horas.

Ao mesmo tempo, Xunta e representantes do sector da hostalaría analizaron unha ampliación por tramos da capacidade dos locais, de acordo ao cumprimento das "normas antiCovid", segundo informou o Goberno galego e ratificou o presidente da Confederación de Empresarios de Hostalaría de Galicia, Cheché Real. Ao encontro, asistiron o vicepresidente primeiro da Xunta, Alfonso Rueda; o conselleiro de Sanidade, Julio García Comesaña, e a directora xeral de Saúde Pública, Carmen Durán, ademais de representantes da hostalaría.

Segundo informou o Executivo galego, a Consellería de Sanidade remitiu aos representantes hostaleiros un documento elaborado pola Dirección Xeral de Saúde Pública no que se recollen os indicadores que permitirán unha maior apertura dos locais de lecer. "Trátase dun marco definitivo e estable para o sector da hostalaría que ofrece un sistema xeral para toda Galicia", indica.

Ademais, engade que este documento, aínda aberto, e á espera de recibir e estudar as alegacións que o sector presente, "abre un novo marco no que o cumprimento de medidas anticovid extraordinarias, como son a instalación de medidores de CO2 con sondas para limpar o aire, o uso de menús QR, empregar manteis dun só uso ou levar a cabo unha maior limpeza periódica dos locais, levaría unha ampliación por tramos da súa ocupación".

Con todo, precisa que o documento final someterase a análise por parte do comité clínico para a súa aprobación e posterior posta en marcha. Sobre o encontro, o conselleiro de Sanidade sinalou que se trataría dun modelo con "máis flexibilidade e de forma máis planificada" e "non tan pendentes" da incidencia.

Respecto da petición da apertura das barras e a flexibilidade de horarios, dixo que é "difícil de soster porque a distancia de seguridade é máis difícil de alcanzar".

"Non é unha liña na que esteamos a traballar agora mesmo, aínda que non hai nada pechado", engadiu Comesaña, que tamén apostilou que non se expón en canto a horarios. Á vez, defendeu un "lecer controlado e seguro" como a mellor "alternativa" no actual contexto. De novo, lamentou que non se autorizase o certificado Covid, aínda que trasladou o respecto pola decisión do Tribunal Superior de Xustiza de Galicia (TSXG).

VALORACIÓN DE HOSTALEIROS

En canto á reunión, o presidente da Confederación de Empresarios de Hostalaría de Galicia, Cheché Real, precisou que serían niveis que non se basearían, para determinar a capacidade, na incidencia de contaxios, se non nas medidas que implemente o hostaleiro. "Medidas cunha declaración responsable", cun control da mesma por parte de Sanidade, segundo apuntou.

"Sen impor nada", sentenciou, precisando que a suba dun nivel a outro, e a posibilidade de ter máis capacidade, estaría condicionado ao cumprimento das citadas medidas antiCovid e coa esixencia de incrementar as medidas de seguridade a este respecto se se quere pasar a un nivel con máis capacidade. Como a Xunta, confirmou que estas cuestións aínda están por concretar de forma definitiva.

Mentres, non se pronunciou sobre o contido do auto emitido polo Tribunal Superior de Xustiza de Galicia (TSXG) cos argumentos do fallo que xa adiantou o sábado para rexeitar a esixencia do certificado Covid na hostalaría. No entanto, e tras considerar positiva a medida, considerou que os xuíces "se basean en leis que son de hai anos, pero os tribunais superiores non son técnicos sanitarios, nin virólogos, nin científicos".

En canto ao último cambio de restricións por parte da Xunta, o tamén presidente dos hostaleiros de Lugo mostrouse "medianamente satisfeito". "Queremos máis para chegar a conseguir o cento por cento dos nosos espazos e recuperar o cento por cento dos nosos horarios", recoñeceu.

Desde Hostalaría Federada Galega (Hosfega), o seu vicepresidente, Sergio Fernández, asegurou que non foron convocados á reunión e eludiu valorar o contido da mesma ata que as propostas non se recollan en documento.

Con todo, e polo que transcendeu, asegurou que "moitas medidas" as levan reclamando "desde hai máis dun ano, co noso plan de rescate". Ademais, mostráronse "abertos ao diálogo" para alcanzar acordos. Mentres, sobre o auto do TSXG, e á espera de coñecer o seu contido con máis detalle, apoia o comunicado remitido por Lugo Monumental para quen o alto tribunal galego apoia a súa postura.

"O 'pasaporte Covid' non só non é legal, senón que foi inútil e, o que é máis grave, puxo en perigo o persoal de hostalaría non vacinado e os clientes que entraban con PCR negativa". Ademais, espera que a Xunta de Galicia "tome nota desta situación e anule de inmediato as restricións en exterior (en terraza) e modere as de interior en función dos contagios reais no sector da hostalaría ou noutros indicadores relevantes".

ALBERGUES

O vicepresidente primeiro, Alfonso Rueda, e o conselleiro de Sanidade, Julio García Comesaña, reuníronse con representantes do sector, segundo informou Turismo, para realizar "unha avaliación da situación actual polo progresivo incremento de peregrinos" --ata este xoves, 79.145 compostelas seladas--.

Nesta reunión, concretouse o protocolo a seguir ante a nova situación e "ante a posibilidade de seguir incrementando a capacidade dos albergues se a evolución epidemiolóxica segue sendo favorable".

Así, e do mesmo xeito que anteriormente o fixo o sector do lecer nocturno, oito albergues de diferentes rutas do Camiño participarán nunha proba piloto que "permitirá elaborar un manual de boas prácticas, co uso de mediadores do CO2 e outras medidas que garantan unha correcta ventilación".

A Consellería lembrou que estas medidas se suman ás xa vixentes, posto que os albergues contan cun protocolo de actuación ante a covid para "dar seguridade tanto a peregrinos como a propietarios dos albergues", ou o seguro coronavirus, entre outras medidas.