A alcaldesa de Forcarei critica o peche de sucursais de Abanca no rural "despois de recibir moito diñeiro público"
Verónica Pichel fixo estas declaracións durante a visita do Delegado do Goberno, José Miñones, ao seu concello.
Por E.P. | SANTIAGO DE COMPOSTELA | 20/08/2021 | Actualizada ás 18:45
A alcaldesa de Forcarei, Verónica Pichel, afeou que Abanca decrete o peche de sucursais bancarias no rural "despois de recibir moito diñeiro público", polo que pediu á entidade financeira que reconsidere estas clausuras, que no caso do municipio pontevedrés afecta á localidade de Soutelo de Montes.
"Fan referencia aos números, pero aquí non só vai de números. É unha entidade financeira que recibiu moito diñeiro público e deberíase ter en conta non só os números, senón tamén ás persoas", declarou a rexedora socialista en declaracións aos medios este venres durante a visita do delegado do Goberno, José Miñones, ao seu concello.
Alí, o representante do Executivo estatal na Comunidade galega mostrou a súa inquietude polo peche de sucursais bancarias en zonas do rural e, aínda que resaltou as medidas postas en marcha por Correos para achegar os servizos bancarios a estas poboacións, recoñeceu que "unha cousa non suple á outra" e unicamente "son complementos".
Neste sentido, Miñones ha reconcido que está en contacto coa Federación Galega de Municipios e Provincias, que o pasado xoves emitiu un comunicado para expresar a súa preocupación pola "fuga" de sucursais bancarias das zonas do rural, algo que cren que "non é compatible coa realidade galega" e que "agravará" a situación de "baleirado" nestas zonas.
Neste sentido, o delegado incidiu na necesidade de que as poboacións do rural conten con servizos "de calidade" que "permitan a súa progresión persoal, social e ecónomica", como, di, unha conexión a Internet que permita "favorecer a igualdade de oportunidades" con independencia do lugar de residencia.
Así, Miñones puxo o acento no plan de extensión da banda ancha, que dotará de mellor cobertura ás zonas do rural para alcanzar a case o 84% da poboación do Galicia cunha conexión de rede fixa a unha velocidade de 100 megabytes por segundo.
