Por E.P. | SANTIAGO DE COMPOSTELA | 24/08/2021 | Actualizada ás 18:27
O Concello de Ferrol organizará este fin de semana, de venres 27 a domingo 29, diversos actos para conmemorar o 221º aniversario da Batalla de Brión, que lembra o enfrontamento entre tropas inglesas e veciños de Ferrol, no ano 1800, no que os vencedores foron os habitantes locais.
A concelleira de Patrimonio Histórico de Ferrol, Eva Martínez Montero, e o secretario da Asociación Batalla de Brión, Marcelo Ruiz, presentaron os actos cos que Ferrol vai conmemorar dita batalla, que se volven a ver condicionados polas restricións sanitarias.
O programa de actividades comezará o venres, ás 17,00 horas, cunha visita guiada ao Castelo de San Felipe, á que lle seguirá ás 19,00 horas unha mesa redonda na fortaleza, na recentemente rehabilitada Sala de Cureñas, coa participación de Ramón Montero Cereijo, arquitecto e redactor do proxecto e director da obra de rehabilitación da torre do século XIX da batería baixa do Castelo de San Felipe para usos expositivos, e José Manuel López Hermida, comandante de artillaría e coautor do libro 'Guía de baterías de costa. Provincia da Coruña (Norte)'.
CHAMAMENTO ÁS ARMAS
O sábado, 28 de agosto, recrearase na praza de Armas, ás 11,00 horas, a reunión de participantes para defender Ferrol e ás 12,00 terá lugar o chamamento ás armas e unha exhibición de esgrima. Ás 13,00 horas comezará a marcha cara ao Baluarte de San Xoán, onde terá lugar o acto conmemorativo aos heroes, a salva de honras e a ofrenda floral.
Xa pola tarde, ás 17,30 horas, haberá unha visita guiada ao Castelo de San Felipe, neste caso teatralizada, e media hora despois comezará unhas exhibicións de cabalaría, artillaría, material e esgrima na Praza da Constitución.
O domingo, ás 11,30 horas, celebrarase unha busca do tesouro no castelo dirixida aos máis pequenos e ás 17,30 horas haberá unha nova visita teatralizada á fortaleza. O número máximo de participantes en cada unha das actividades será de 20 máis o guía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.