Crespóns negros en Campo Lameiro contra o peche da oficina bancaria
O comercio de Campo Lameiro lamenta o peche da oficina de Abanca. O vindeiro venres haberá unha manifestación contra a clausura da sede bancaria.
Por E.P. | SANTIAGO DE COMPOSTELA | 25/08/2021 | Actualizada ás 15:09
Os establecementos comerciais de Campo Lameiro colocaron crespóns negros en sinal de rexeitamento e protesta polo próximo peche da oficina de Abanca previsto para o 8 de setembro, a única sucursal bancaria do municipio.
Deste xeito, súmanse ás mobilizacións convocadas polos tres grupos que compoñen a corporación local (PPdeG, Porvir e PSdeG-PSOE) que desembocarán este venres nunha manifestación que partirá ás 20,30 horas da Praza do Concello ata a propia sucursal da entidade.
Os comerciantes anunciaron a súa participación e que pecharán os seus negocios unha hora antes da saída da marcha. Ademais dos crespóns, o centro do municipio conta con media ducia de pancartas en apoio ás protestas colocadas polo propio Goberno local.
Os organizadores da manifestación remitiron unha carta aos veciños explicando a delicada situación na que queda o municipio por mor deste peche e as súas consecuencias sociais e económicas, chamando ademais á participación que se celebrará este venres.
