Veciños de Casalonga denuncian a existencia do “maior depósito ilegal” de residuos en Galicia

A Plataforma formada por veciños de Casalonga (Teo), sinala que “a Dirección Xeral de Planificación Enerxética e Recursos Naturais e a de  Medio  Ambiente  son  coñecedoras” do depósito de residuos procedentes de obras. A pesar disto,  denuncian que ambas institucións non  tomaron  “ningunha medida nin sancionaron á empresa”.

O colectivo veciñal de Casalonga denuncia que “agora aproban un plan no que estes residuos non existen”.  Por outra parte, tamén apuntan que a  “responsabilidade  de  xestionar  os  residuos  existentes  recae  segundo  a  Lei  de  residuos  e  solos  contaminados no propietario dos terreos, actualmente Toysal”.  Por este motivo, a  plataforma  solicita  formalmente  un  pleno  monográfico  no  concello  sobre o problema da canteira.

Segundo os cálculos da Plataforma, na antiga canteira de Casalonga existe un “depósito duns 400.000 m3 de residuos procedentes principalmente de restos de obra”. Nos últimos tempos mesmo se  amorean  alí  residuos  de  particulares  que  “se  achegan  cos  seus  propios  coches  sen que  nin  os  propietarios  do  terreo  nin  as  dúas  consellerías  implicadas  tomen  medias  ao respecto”.

Nunha nota de prensa, a Plataforma informa que “a veciñanza e o Concello de Teo son os únicos que se encargan de vixiar diariamente  a  presenza  de  novos  vertidos”. Ademais, o colectivo veciñal tamén sinala que “coa privatización da pista pública pola que ata o de agora transitaban diariamente os veciños, ninguén poñerá xa freo  á  acumulación  de  novos  vertidos”. Por todo isto, a Plataforma solicitou a convocatoria dun pleno extraordinario no Concello sobre as posibilidades de actuación municipal ao respecto da situación da canteira.