O 24º Salón da Alimentación do Atlántico celebrarase en Silleda entre o 3 e o 5 de setembro

O 24º Salón dá Alimentación do Atlántico celebrarase en Silleda entre o 3 e o 5 de setembro e contará ademais coa presenza da Consellería de Emprego e Igualdade, que disporá dun posto institucional de Economía Social.

Segundo informou o departamento da Xunta nun comunicado, o obxectivo é "ofrecer e presentar os produtos de ata nove empresas do sector". "O posto pretende ser un escaparate para que empresas vinculadas á economía social e o cooperativismo poidan ofrecer e promocionar os seus produtos", sinala a Consellería.

Entre os produtos mencionados, destacan os lácteos, derivados e apícolas (Bico de Xeado, Produtores do Campo de Capela, Gaia SCG); vitivinícolas (Adegas Eidosela); cárnicos (Cogal); hortofrutícolas (Andaina Prol Saúde Mental Emprego SLU, Freshcut, Alcrique SCG) e salsas e condimentos (A Factoría do Lume SCG).

Ademais, está previsto que neste espazo se ofrezan algúns destes produtos como queixos, marmeladas, zumes, viños, xeados, licores e salsas. As empresas presentes na caseta contarán con expertos que informarán e explicarán a todos os interesados as distintas características e peculiaridades de cada artigo, e darán ademais a oportunidade aos asistentes de probar "combinacións innovadoras de produtos autóctonos de calidade".

Doutra banda, co obxectivo de promocionar os produtos galegos fóra e "en aras de internacionalizar a oferta", as empresas expositoras acudirán a Encontros Internacionais de Compradores a través de reunións que lles permitirán contactar de forma planificada con importadores de Perú, México, Reino Unido, Suecia, Portugal, Dinamarca, e Portugal, entre outros.

Produtos de Casa Macán | Fonte: Lácteos Casa Macán