O aparcadoiro disuasorio de Canido conta xa cun panel colaborativo de "sticker art", a arte de decorar con adhesivos
A iniciativa forma parte da programación do festival "Meninas de Canido" e promóvea o fotógrafo Carlos Muiños co lema "Pégate ás Meninas".
Por Galicia Confidencial | Compostela | 30/08/2021 | Actualizada ás 14:44
O aparcadoiro disuasorio de Canido albergará, desde hoxe, un panel colaborativo de "sticker art", no marco da programación oficial do festival "Meninas de Canido". O fotógrafo local, Carlos Muiños, promove este movemento artístico que consiste en decorar a contorna urbana con adhesivos.
O movemento colaborativo rexerase por unha serie de "sinxelas" normas: deixar libre o interior das letras coa mensaxe de "Pégate ás Meninas'" e colocar máximo dous adhesivos do mesmo deseño e con suficiente espazo entre eles. Ademais, haberá que "respectar os adhesivos que xa estean colocados e repartilos de maneira uniforme polo panel".
O propio Muiños foi o encargado, esta mañá, de inaugurar o panel de arte urbana con dous dos seus adhesivos, iniciando este movemento co que espera "promover a creatividade e atraer a artistas desta disciplina para visitar o barrio de Canido".
