Por Galicia Confidencial | Pontevedra | 31/08/2021 | Actualizada ás 14:27
O vicepresidente da Xunta, Alfonso Rueda, instou ao Goberno a "non porse de lado" e ofrecer unha alternativa á fábrica de Ence en Pontevedra, cuxa prórroga para ocupar terreos de Costas foi anulada pola Audiencia Nacional. Nun almorzo informativo celebrado en Pontevedra, Rueda sinalou que "os que queren que non siga a fábrica terán que ter unha solución" porque, segundo engadiu, o goberno galego "non a ten".
A Xunta, apuntou o seu vicepresidente, "se pode ser parte da solución, serao", pero asegurou que a solución ao problema de Ence "non pode partir dunha administración que dixo que a solución a tiñamos diante dos narices e empeñámonos en rebentala".
O goberno galego insiste en que "non temos alternativa" para a pasteira, xa que o lugar "no que tiña que estar" a fábrica de Ence en Galicia "é no que está actualmente". "É a localización que permitía a súa consolidación e o seu crecemento", sinalou o dirixente autonómico, que desvelou que este xoves o conselleiro de Economía, Francisco Conde, reunirase cos representantes do comité de empresa da fábrica pontevedresa.
En relación á reunión da mesa de traballo sobre Ence, que o Ministerio para a Transición Ecolóxica convocou para o próximo 10 de setembro, Rueda espera que o Goberno nos diga a todos cal é a formulación" despois de "provocar este terremoto".
Xunto co Concello de Pontevedra, insistiu o vicepresidente da Xunta, "de súpeto decidiron que aquí non podía seguir e que había que facer o posible para que marchase" e dixo que, a falta dos recursos xudiciais, "parece ser que o conseguiron". "A Xunta non fixo nada. Son eles os que botaron a fábrica", afirmou Rueda, que instou a estas dúas administracións a que revelen "cal é a solución para que o traballo de Ence quede na comarca de Pontevedra".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.