Por Europa Press / Redacción | SANTIAGO DE COMPOSTELA | 02/09/2021 | Actualizada ás 14:34
A Consellería de Emprego considera que os datos do paro e das afiliacións á Seguridade Social, feitos públicos este xoves, evidencian que Galicia "continúa a resistir" á pandemia e, en particular, destaca o feito de que sexa "a única comunidade que encadea oito meses de baixada do paro mensual desde xaneiro". Mentres, os sindicatos alertan da precariedade laboral e reclaman medidas.
Entre outros datos, a Administración galega subliña que "se consegue crear emprego ao elevar as afiliacións o mes pasado, cando no Estado descenderon un 0,60% fronte a xullo". "Nestes momentos Galicia rexistra os mellores niveis de paro desde agosto de 2008, fai catorce anos, cando se contabilizaron 152.437 persoas fronte ás 151.264 do pasado agosto", apunta o departamento autonómico.
E é que para a directora xeral de Formación e Colocación, Zeltia Lado, Galicia "continúa resistindo á covid-19". "Levamos desde xaneiro reducindo o paro mes a mes", indica nun comunicado no que subliña que se avanza "cara a unha recuperación progresiva da actividade, que se reflicte no dinamismo do noso mercado de traballo". Ademais, incide en que desde 2017 non se rexistrou un descenso mensual do desemprego nun mes de agosto "e esta vez conseguiuse".
Os SINDICATOS RECLAMAN MEDIDAS
Mentres, CCOO insta a Xunta de Galicia a "abandonar a mercadotecnia política e facer política real" para afrontar os problemas que, na súa opinión, mostra o mercado de traballo en Galicia. "Os datos do paro rexistrado, coñecidos hoxe, revelan que o desemprego se reduciu en agosto de maneira testemuñal, só un 0,44%, mentres que a afiliación á Seguridade Social caeu un punto respecto do mes anterior".
"Isto evidencia o fin da contratación estival e o retorno á minoración do emprego", segundo a análise de CCOO. Pola súa banda, UGT-Galicia considera que, en conxunto, os datos de emprego do período estival supuxeron "un novo avance da recuperación do mercado laboral". "Con todo, é importante que a tendencia persista", insiste este sindicato, que reclama unha remodelación do mercado laboral e do modelo produtivo a través de "profundas reformas".
DESEMPREGO FEMININO
Desde a CIG, sosteñen que as cifras sobre o desemprego en agosto "seguen evidenciando unha evolución moi preocupante do mundo do traballo, cun aumento da precariedade e da temporalidade, especialmente entre as mulleres".
"Ata o punto de que o desemprego feminino incrementouse un 0,3% a pesar do leve descenso do paro rexistrado neste período", indica esta central que remarca que "unicamente un 7,6% dos novos contratos foron indefinidos". Desta situación, responsabiliza ás reformas laborais de PSOE e PP.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.