A Xunta apoia a expansión da multinacional da comida lixo McDonald's en Galicia
Abre este martes o seu establecemento 550 en Santiago de Compostela, o segundo da cidade, destacando que así "contribúe" á celebración do Ano Santo.
Por Europa Press / Redacción | Santiago de Compostela | 06/09/2021 | Actualizada ás 21:25
OUn novo restaurante de McDonald's, o 550 da compañía, abre as súas portas este martes, día 7 de setembro, no parque empresarial da Sionlla (Santiago de Compostela), sumándose ao xa existente na cidade. Unha nova expansión da cadea multinacional dos EE.UU. en Galicia que é apoiada pola Xunta.
A súa apertura, segundo destacou a compañía, suporá un "impulso" no emprego da localidade coa creación duns 40 postos de traballo fixos. Entre eles, destaca a figura implementada por mor da crise sanitaria de Responsable de Seguridade e Hixiene, que ten o obxectivo de asegurar que se cumpre o protocolo covid no establecemento.
A inauguración do local produciuse a tarde deste luns, e a ela asistiron o delegado territorial da Xunta de Galicia na Coruña, Gonzalo Trenor; o presidente de McDonald's España, Luís Quintiliano; e a franquiciada e encargada da dirección do establecemento, Susana Vidal.
Desta maneira, o novo restaurante conta cunha superficie de 343 metros cadrados e 234 metros adicionais de terraza, ademais de espazo para 96 prazas de aparcadoiro e capacidade para 64 persoas.
40 ANIVERSARIO DA COMPAÑÍA
Na súa intervención, Luís Quintiliano destacou que a apertura coincide co 40 aniversario da compañía en España e que, ademais, supón, para el, un "privilexio" poder inauguralo en ano Xacobeo.
Nesta liña, Gonzalo Tenor resaltou que o local pode "contribuír" á celebración do Ano Santo e que resulta "alentador" ver a capacidade de recuperación da Comunidade galega para saír de "unha das etapas máis duras", en referencia á crise económica derivada da covid-19.
"APOSTA POLO COMERCIO LOCAL"
Por outra banda, Luís Quintiliano falou sobre a presenza da compañía en Galicia e asegurou que crea 600 empregos directos na Comunidade, ademais de ter como "aceno de identidade" a aposta polo comercio local.
