Os plans eólicos do Goberno na costa galega poderían afectar "seriamente" á pesca

Novo episodio no desenvolvemento da enerxía eólica en Galicia. Desta vez, a alerta está situada sobre aquelas explotacións de vento pensadas para a costa, a eólica mariña, e o foco queda posto non sobre a Xunta de Galicia --responsable dos proxectos por baixo dos 50MW--, senón sobre o Goberno Central, que está a impulsar novos plans de ordenación nos que se rexerían os usos da costa galega.

Estes POEM (Plans de Ordenación do Espacio Marítimo) veñen de ser duramente contestados pola Federación Ecoloxista Galega (FEG). A asociación apunta nun comunicado ao que tivo acceso Galicia Confidencial que acaba de remitir un escrito de observacións a Goberno central aproveitando unha ampliación do prazo no tocante ás alegacións contra o documento.

Dende a Federación Ecoloxista Galega recoñecen que é competencia do Estado delimitar os usos do litoral estatal, pero critican que os informes se desenvolvan sen un “estudo específico” que teña en conta “as necesidades e impactos en Galiza”. A FEG apunta así ás “ameazas” que se derivan deste plan e, en particular, no que respecta á eólica mariña, para a cal os POEM do goberno establecen “extensas” ‘zonas de uso prioritario’ e de ‘alto potencial’ para o seu desenvolvemento.

AFECIÓN ECOLÓXICA E PESQUEIRA

O problema viría dado porque estas infraestruturas afectarían a zonas “de grande valor ecolóxico” dentro da plataforma continental galega, chegando a producir danos que, de acordo coas mesmas fontes, poderían comprometer “seriamente” a actividade pesqueira da frota galega. En particular, apuntan a zonas que actúan “como áreas de reprodución de especies piscícolas” e onde existen “caladoiros importantes”.

No seu escrito, a FEG, fai notar a “falla de sustentabilidade” dos plans, que ven “lonxe” de responder ao obxectivo 14 da axenda 2030 para o Desenvolvemento Sostible da UE, que se enuncia “Conservar e utilizar en forma sostible os océanos, os mares e os recursos mariños para o desenvolvemento sostible”. Piden entón non considerar o océano como un “sumidoiro infinito de todo tipo de residuos, que soporta todo tipo de actuacións e que proporciona recursos de forma eterna. Ao contrario, os feitos amosan que xa non caben máis contaminantes e que os ecosistemas e os fondos están gravemente danados polo que a actividade extractiva está comprometida e ameazada pola degradación ambiental”, engaden.

PROXECTOS FÓRA DA REGULACIÓN

A estas advertencias da FEG únese o feito de que, na actualidade, habería en estado de tramitación dous proxectos de parques eólicos marítimos flotantes nas costas da provincia da Coruña, os de San Cibrao e San Brandan, proxectados con anticipación ao inicio da tramitación destes plans de ordenación e que “non respectan as áreas para enerxía eólica mariña que neles se pretende establecer”.