A reapertura da comisión sobre o accidente de Angrois, pendente da decisión do Congreso a vindeira semana
O pasado abril, asociacións de vítimas presentaron unha demanda contra o Ministerio de Transportes e a Comisión de Investigación de Accidentes Ferroviarios (CIAF) pola negativa desta última a realizar unha investigación independente.
Por Europa Press / Redacción | MADRID | 15/09/2021 | Actualizada ás 15:50
O Congreso decidirá no Pleno da próxima semana se reabre a comisión de investigación para esclarecer as causas do accidente ferroviario do Alvia que tivo lugar en Santiago de Compostela o 24 de xullo de 2013 e no que faleceron 80 persoas e 52 resultaron feridas.
Esta comisión xa funcionou na Cámara Baixa en 2018 e 2019, pero non puido concluír os seus traballos pola disolución das Cortes. Pero o BNG, xunto con ERC e Bildu, rexistraron o pasado xullo unha iniciativa coa intención de recuperar esa comisión, sobre a que o Pleno se pronunciará o próximo 23 de setembro.
No BNG dan por feito que esta solicitude sairá adiante porque, ata a data, só o PP expresou os seus receos a reabrir o asunto, e porque as novas informacións sobre "irregularidades e incumprimentos" en torno ao caso, coñecidas grazas aos requirimentos das institucións europeas, esixen retomar os traballos desa comisión.
Para o deputado do BNG, Néstor Rego, é vital importancia que os traballos realizados xa no Congreso poidan retomarse "para poder lograr o esclarecemento da cadea de responsabilidades e, ademais, determinar as recomendacións que permitan no futuro evitar outro accidente nas que debe recollerse o cumprimento das Directivas e Regulamentos europeos".
XUÍZO EN 2022
Na súa iniciativa, o BNG, ERC e Bildu indican que, oito anos despois da catástrofe, aínda quedan "moitos cabos soltos" sobre as causas e responsabilidades da mesma e recalcan que, a pesar das múltiples investigacións realizadas, "hai evidentes sombras nos procedementos das pescudas".
Así, sinalan que a instrución xudicial pechouse o pasado mes de abril, deixando imputados unicamente ao xefe de seguridade de ADIF e ao maquinista do convoi accidentado, e que o xuízo está previsto para mediados de 2022.
Tamén o pasado abril, asociacións de vítimas presentaron unha demanda contra o Ministerio de Transportes e a Comisión de Investigación de Accidentes Ferroviarios (CIAF) pola negativa desta última a realizar unha investigación independente como a que se demandou desde distintas instancias europeas como a propia Comisión, o Parlamento e a Axencia Ferroviaria.
PROCEDEMENTO CONTRA ESPAÑA
Neste contexto, os promotores da iniciativa apuntan que diversas denuncias levaron, en xaneiro de 2019, á apertura dun procedemento de infracción contra España por incumprimento da normativa de seguridade ferroviaria que aínda segue aberto.
Respecto da comisión que xa se creou no Congreso, recalcan que moitos dos comparecentes arroxaron "serias dúbidas" relativas ás "responsabilidades cruzadas entre diferentes axentes implicados, tanto políticos como técnicos, mesmo desde a licitación e execución das obras a liña.
Ademais, lembran que "tamén quedou en dúbida a xestión do propio accidente e as investigacións e actuacións levadas a cabo posteriormente, como a posta en marcha de novas medidas para asegurar a liña e os propios convois que circulan por ela ante posibles futuros accidentes".
Así as cousas, e sobre todo tras a negativa da CIAF a abrir unha investigación independente, BNG, ERC e Bildu queren retomar as pescudas en sede parlamentaria "para poder arroxar as conclusións que esclarezan a cadea de responsabilidades e recomendacións de medidas a levar a cabo para evitar outro accidente e para esixir o cumprimento das diversas directivas e regulamentos afectados".
