Por Europa Press / Redacción | SANTIAGO DE COMPOSTELA | 18/09/2021 | Actualizada ás 14:47
O conselleiro de Sanidade, Julio García Comesaña, realizou un chamado aos cidadáns sen vacinar para participar este domingo na convocatoria aberta nas diferentes áreas sanitarias e sen necesidade de cita, co fin de "seguir sumando" e avanzando no obxectivo de alcanzar o cento por cento da poboación.
Comesaña lembrou que este sábado reciben as segunda doses menores de entre 12 e 14 anos que participaron no proceso hai 26 días, coa idea de terminar "de modo organizado" a campaña de convocatorias de inoculación masiva de toda a poboación.
En paralelo, Sanidade mantén o proceso de repesca, con convocatorias abertas e posibilidade de autocita que se repetiron o venres e continuarán este domingo. É por iso que Comesaña chamou a participar a todos aqueles que "por diversas circunstancias" non conten aínda coa primeira dose da vacina, dado que a deste domingo será "practicamente das últimas" convocatorias tendo en conta que o Goberno está a estudar e traballando xa "na terceira dose".
Neste sentido, lembrou que os cidadáns teñen a posibilidade de pedir autocita a través da aplicación do Sergas para "se non queren esperar ou ter demoras" nas colas, e reivindicou os datos de vacinación de Galicia para animar a "seguir sumando".
"É a comunidade autónoma con maior porcentaxe de primeiras doses", lembrou, ao alcanzar o 93,3 por cento, e destacou o obxectivo de terminar setembro co maior número de galegos con primeiras e segundas doses inoculadas.
BOA EVOLUCIÓN
O titular de Sanidade valorou, ademais, os "bos" datos da evolución da pandemia, posto que a comunidade segue "baixando" tanto na incidencia a 14 como a 7 días e mantén un "escenario bo".
En todo caso, apelou ao número de pacientes en UCI para instar a "seguir sendo prudentes" e "insistir" no mantemento das medidas de seguridade como a distancia interpersoal, o uso de máscara "e sobre todo na vacinación", mentres se procede progresivamente a "liberar restricións" como as limitacións de reunións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.