Acordo entre sindicatos e USC para recoñecer a antigüidade do persoal investigador e de apoio

Representantes sindicais e da Universidade de Santiago de Compostela asinaron este martes o acordo para o recoñecemento da antigüidade do persoal con contratos predoutorais e postdoctorais e con cargo a proxectos de investigación.

O colectivo poderá recibir o pago de trienios con efecto inmediato, pero o acordo tamén establece un réxime transitorio que permitiría a aqueles traballadores con máis de tres anos de contrato en calquera universidade ou administración pública poida solicitar o abono deste complemento.

En concreto, esta aplicación gradual implicará que o persoal con seis anos traballados ou máis poderá percibir o importe de dous trienios a partir de xaneiro de 2022. A partir de 2023 abonaríanse ata tres, en 2024 ata catro e a partir de 2025 todos os que correspondan, segundo explica a USC nun comunicado.

O documento está asinado por Javier Ferreira, xerente da institución; Ernesto González, vicerreitor de Profesorado; Vicente Pérez vicerreitor de Investigación e Innovación; José Antonio Rodríguez Añón, de CCOO; Óscar Rodil Marzábal, de CIG-Ensino; María del Carmen Espiñeira Regueiro, de CIG-PAS; Benjamín Rey Sanjurjo, de UGT; e Luís Alberto Gómez Segade, de CSIF.

O reitor compostelán, Antonio López, agradeceu a firma deste acordo e valorou o traballo "entre todos" e a través do "diálogo" para ofrecer "unha solución para a realidade neste ámbito, tan singular e específica, como é a da USC".

Ferreira, pola súa banda, considerou que se trata de "un recoñecemento laboral loxicamente razoable e merecido" e apelou á responsabilidade do Goberno central e da Xunta, que financian os contratos orixinais. Neste sentido, destacou a necesidade de realizar un pago gradual dos trienios para ser capaces "de facer fronte a este esforzo orzamentario".

Reunión entre a USC e os sindicatos. USC | Fonte: Europa Press