Por E.P. | SANTIAGO DE COMPOSTELA | 22/09/2021 | Actualizada ás 14:04
A portavoz de Sanidade do BNG, Montse Prado, anunciou que a formación interpelará ao conselleiro de Sanidade, Julio García Comesaña, sobre o falecemento dun paciente durante un traslado nunha ambulancia sen asistencia sanitaria enviada polo 061 e remarcou que resultan precisos "luz e taquígrafos" para coñecer "como se presta o servizo de transporte sanitario urxente" na área.
Así se pronunciou, durante unha rolda de prensa en Vigo, despois de que a CIG denunciase que o xoves pasado na cidade unha persoa que viaxaba nunha ambulancia sufriu unha indisposición e non se lle puideron practicar tarefas de soporte vital debido a que non se dispuña do material preciso para iso e o vehículo, da empresa Coexam, só contaba cun condutor. Finalmente, o paciente ingresou no hospital despois de falecer.
Ante esta situación, a deputada autonómica recalcou a necesidade dunha "rectificación" por parte do Goberno galego respecto da súa política sanitaria, así como de "inspeccións" que permitan comprobar "en que condicións" operan as empresas que prestan o servizo de transporte urxente.
Así, advertiu de que a "dotación insuficiente" de medios leva "consecuencias letais" para a poboación e recalcou que o falecemento dun paciente nunha ambulancia que carecía de persoal para prestar asistencia sanitaria "non foi un accidente". Por iso, Prado avanzou que o BNG interpelará ao titular de Sanidade sobre esta cuestión durante o próximo pleno do Parlamento de Galicia e a situación do transporte sanitario urxente na área sanitaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.