A ría de Muros-Noia seguirá pechada ao marisqueo pola toxina

A ría de Muros-Noia (zonas II e III) manterase pechada á extracción de moluscos tras as últimas análises publicadas este mércores polo Instituto Tecnolóxico para o Control do Medio Mariño (Intecmar) nos que se detectan presenza de toxina.

O secretario da confraría, Adelo Freire, explica que se mantén o peche porque os resultados arroxan que "soben un pouco os índices de toxina respecto ao anterior".

A campaña de ameixa e berberecho ía comezar o luns, 20 de setembro, pero a marea vermella impídeo por agora. A próxima analítica farase o venres, polo que os resultados non se coñecerán ata o sábado, de maneira que, "como mínimo", ata o luns non poderán saír a faenar no mellor dos casos, segundo indica Freire.

E é que a última analítica reflicte que, "de momento, non mellorou nada", mesmo "empeorou de onte para hoxe", polo que "máis de 1.300" produtores seguirán sen poder traballar nos bancos marisqueiros da ría.

De tal forma, o secretario do depósito de Noia sinala que agora "non queda outra que ter paciencia, resignación e esperar que mellore".

Mentres, a gran maioría dos polígonos de mexillón de Galicia mantéñense clausurados por este episodio de marea vermella. O Intecmar tamén resolveu este mércores pechar á extracción a zona Grove A, na ría de Arousa, pola presenza de toxina lipofílica. En cambio, decidiu reabrir á extracción a zona de Redondela C, na ría de Vigo.