Por E.P. | OURENSE | 22/09/2021 | Actualizada ás 19:44
O portavoz municipal do BNG de Viana do Bolo, Secundino Fernández, presentou este mércores no xulgado de paz de Viana, un acto de conciliación contra o Partido Popular do municipio e Andrés Montesinos Rodríguez "ante a escalada de calumnias e ameazas dos últimos meses". Fernández estivo acompañado pola deputada por Ourense e membro da Executiva Nacional, Noa Presas, e polo concelleiro Jose Antonio Alfonso.
Nun comunicado, o BNG lembrou que "xa desde antes da ilexítima mocion de censura, o PP de Viana dedicábase a esparcir calumnias e difamacións sobre o Grupo Municipal de Viana, especialmente sobre Secundino Fernández, ao que no anterior mandato levaron sen éxito aos xulgados buscando un apoio social que non tiñan".
A este respecto, Presas sinalou que esta situación se viu "agravada" nos últimos meses, especialmente desde que en xuño "se acusase desde as redes sociais oficiais do PP a Secundino de feitos tran graves como o uso da violencia ou o enaltecemento do terrorismo". A deputada remarcou ademais que "non quedou aí", senón que se repetiron coaccións de todo tipo "en ton ameazante", "máis propio de matóns que dun Goberno municipal".
O BNG considera "inadmisible" que, a día de hoxe, nin Baltar nin a dirección galega do PP "desautorizase" esa forma de actuar, o que, na súa opinión, "demostra unha concepción da política como un feudo no que quen pense diferente non ten dereito a existir".
Secundino Fernández recalcou que presentaron este acto conciliatorio ante "as graves acusacións, ataques e ameazas que están fóra de calquera réplica política e que buscan amedrentar e amordazar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.