O Consello Social da USC abordará proxectos como a investigación sobre detección precoz do cancro
Deste xeito, pretenden que, ademais de poder gañar tempo ao diagnóstico dun tumor, esta información tamén teña utilidade á hora de tratar ao paciente para a súa curación.
Por E.P. | SANTIAGO DE COMPOSTELA | 24/09/2021 | Actualizada ás 19:37
Un seminario permanente sobre transición enerxética e futuro industrial, un proxecto de investigación sobre a detección precoz do cancro oral e un taller para achegar a xeografía e a cartografía aos estudantes máis novos son o tres iniciativas seleccionadas polo Consello Social da Universidade de Santiago de Compostela para recibir fondos para a súa posta en marcha este ano 2021.
O órgano de participación social da universidade compostelá presentou este venres o tres proxectos que foron elixidos para recibir impulso a través de 50.000 euros que se repartirán entre as iniciativas elixidas entre un xurado presidido pola presidenta do Consello Social da USC, Cecilia Sierra.
Ela mesma encabezou a rolda de prensa na que se deron a coñecer os proxectos seleccionados ao amparo dun programa que busca impulsar a colaboración entre a institución universitaria e a sociedade a través de accións que incidan no desenvolvemento científico, económico e cultural.
O primeiro deles, impulsado por Luís Miguel Varela Cabo e Josefa Salgado e que recibirá 8.720 euros, consistirá na creación dun seminario permanente encargado de estudar o novo escenario que se abre ante o proceso de transición enerxética e a reconversión industrial.
Segundo explicou Varela Cabo, o obxectivo é crear unha rede de estudo permanente sobre os cambios aos que se enfronta a humanidade ante o proceso de transición enerxética, que abre un período de "cambio moi intenso e moi acelerado" que levará a desaparición de "moito tecido produtivo" que será sustituído por un novo.
Ante este "momento crucial" ao que se enfronta o planeta, a meta é colaborar para que Galicia sexa quen de facerse cun lugar neste novo escenario e facer valer o potencial de universidade desde as súas vertentes investigadora, científica e humanística.
A segunda das iniciativas seleccionadas é a que leva a maior parte dos fondos que o Consello Social da USC destina a esta partida este ano 2021. O proxecto de investigación sobre a detección precoz do cancro oral a través da biopsia líquida recibirá case 24.000 euros para botar a andar baixo o liderado de María Mercedes Suárez e Rafael López.
Acompañados pola xerente da área sanitaria de Santiago, Eloína Núñez, quen destacou o binomio que xogan universidade e Hospital Clínico no plano investigador, os promotores do proxecto sinalaron que o obxectivo é buscar as moléculas que achegan a información sobre a existencia dun cancro antes de que este poida ser detectado con inspección visual ou técnicas radiológicas.
Deste xeito, pretenden que, ademais de poder gañar tempo ao diagnóstico dun tumor, esta información tamén teña utilidade á hora de tratar ao paciente para a súa curación.
CARTOGRAFÍA E MAPAS
Por último, a iniciativa do profesor da Facultade de Xeografía e Historia Carlos Ferrás completa as actividades que se desenvolverán baixo o paraugas do Consello Social. Trátase dun proxecto que pretende achegar a cartografía e a xeografía aos alumnos de estudos medios, así como profundar no desenvolvemento dos mapas de valor engadido.
Para iso, segundo explicou o propio docente, levarán a cabo talleres en todas as comarcas de Galicia e organizarase unha xornada de portas abertas na facultade compostelá. "Isto non é un proxecto de investigación, é un proxecto de achegar o conocimietno á xente", remarcou Ferrás.
