A Deputación de Pontevedra reclama a retirada da Lei do ciclo da auga, que tacha de "chapuza lexislativa"

A Deputación de Pontevedra reclamou a retirada da Lei de xestión do ciclo da auga na que traballa a Xunta e que o organismo provincial considera unha "chapuza lexislativa" que, de levarse a cabo, suporá "un sablazo" para os cidadáns. Nun comunicado, o deputado Carlos Font carga contra a conselleira de Infreaestruturas e Mobilidade, Ethel Vázquez, á que acusa de, coa modificación lexislativa que expón, xerar "alerta social" e o "rexeitamento unánime" dos concellos.

"Non necesitamos máis mentiras, senón que a Xunta poña fin a este despropósito, que xa tivo o antecedente da fracasada 'Sogama da auga' e que continúa con esta chapuza lexislativa", incidiu o tamén edil en Vigo, un dos gobernos locais que maiores discrepancias explicitaron ante a reforma do modelo de xestión da auga proposto pola Xunta.

Así, Font sostén que as entidades locais carecen de "un só número oficial" por parte da Administración autonómica "que explique de onde saen os importes que asignan a eses novos tributos que crean para gravar o abastecemento, rede de colectores e depuradoras".

Así as cousas, incidiu en que as críticas de Vázquez ás alegacións da Fegamp ao borrador lexislativo "son especialmente graves". "A afirmación de que o novo canon de xestión das redes de colectores terá o mesmo impacto económico que as actuais taxas de sumidoiros municipais non se sostén en pé", apostilou.

Por tanto, o deputado cre que a reforma "é máis tributaria que outra cousa" e, no caso de saír adiante, suporá un "negocio excelente" pois, di, por unha banda recadará "máis tributos" e, por outro, "dará outra volta de porca máis contra a autonomía local".

O deputado responsable de Economía no Goberno provincial da Deputación de Pontevedra, Carlos López Font | Fonte: DEPUTACIÓN DE PONTEVEDRA.