Por E.P. | SANTIAGO DE COMPOSTELA | 04/10/2021 | Actualizada ás 12:10
O número de traballadores en expedientes de regulación temporal de emprego (ERTE) situouse a 30 de setembro en 9.842 persoas, o que supón 968 menos que en agosto (-8,95%), segundo os datos que publica este luns o Ministerio de Inclusión, Seguridade Social e Migracións.
Por provincias, os traballadores en ERTE galegos distribúense entre os 4.024 da Coruña, 3.793 de Pontevedra, 1.193 de Ourense e 832 de Lugo. Mentres, en relación coas prestacións para autónomos, o ministerio informa de 12.226 solicitudes en Galicia, 10.250 resoltas a favor.
No conxunto estatal, a cifra alcanzou a 30 de setembro as 239.230 persoas, 32.960 traballadores menos que en agosto segundo a data de notificación do expediente e 17.924 menos en función da data na que produce efectos (data de alta).
O departamento que dirixe José Luís Escrivá explicou que as datas de solicitude do ERTE e a dos seus efectos poden ser distintas debido a que existe unha "certa disparidade" entre a data de notificación e a data de alta. Así, pode ocorrer que unha empresa comunique á Seguridade Social un ERTE para o seu persoal no mes de xuño, aínda que teña efectos nunha data anterior, por exemplo en abril.
En todo caso, o ministerio destacou que as cifras de traballadores en ERTE asociados á covid situáronse en setembro no seu menor nivel desde o inicio da pandemia. Desde maio de 2020, cando 3,6 millóns de traballadores estaban en ERTE, máis do 93% xa o abandonaron.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.