Directivos de Vestas aceptan participar na mesa industrial convocada pola Xunta
O comité de empresa mantén convocada unha manifestación o mesmo día, este martes.
Por Europa Press / Redacción | Viveiro | 04/10/2021 | Actualizada ás 15:31
A mesa industrial para buscar unha solución á crise de Vestas Viveiro, cuxo peche anunciou a empresa para finais de ano, está convocada pola Xunta para este martes ás 16,00 horas, e a compañía confirmou a súa participación, segundo sinalan fontes da firma.
O comité de empresa mantén convocada unha manifestación que sairá unha hora antes, ás 15,00 horas, desde o centro comercial As Cancelas cara á sede da Xunta en San Caetano e o seu presidente, David Mariño, deu por feito que a representación empresarial estaría presente na reunión institucional aínda que apunta que descoñece "a través de quen", nin con que "postura".
Por parte dos traballadores, Mariño destaca que exporán que non teñen "outra postura máis" que a de "ver unha alternativa" ao cesamento da actividade en Chavín.
"Nesa mesa pouco podemos achegar, nós non podemos achegar nin alternativa, nin solución. Iso téñeno que achegar os responsables políticos, a xente da Xunta e do Goberno central, e esperamos que acudan ambas as partes e estean representadas nesa mesa", sinalou.
Polo demais, constatou que todo foi "ben" na carreira iniciada por un traballador de Vestas Viveiro en bicicleta, Alejandro Paleo, quen este domingo saíu de Viveiro con destino á sede da multinacional en Dinamarca.
Percorreu uns 220 quilómetros nesta primeira etapa e chegou a Lugones, en Asturias, para pasar a noite en Oviedo. Con el van outros dous operarios da planta de Chavín que acompañan ao ciclista, que ten por diante uns 2.800 quilómetros.
Unha vez na sede da multinacional, prevé entregar unha carta á dirección da compañía para que non peche a factoría de Viveiro e non leve a cabo o ERE que afecta á totalidade dos 115 traballadores.
