O protocolo de adaptación dos centros eximirá de corentena a alumnos con pauta completa en contacto cun positivo
Esta novidade fora introducida na guía de actuación ante a aparición de casos de covid-19 en centros educativos, aprobada na Comisión de Saúde Pública, pero non viña recollida explicitamente no protocolo educativo elaborado polas Consellerías de Educación e Sanidade.
Por Europa Press / Redacción | SANTIAGO DE COMPOSTELA | 04/10/2021 | Actualizada ás 20:17
A Consellería de Cultura, Educación e Universidade actualizou este luns o protocolo de adaptación dos centros ao contexto de covid-19 vixente este curso. Unha nova versión que matiza, sobre todo, cuestións relacionadas coa xestión de brotes nas instalacións educativas, pero que tamén recolle explicitamente que os contactos directos dun positivo quedarán exentos de corentena en caso de ser maiores de 12 anos e contar coa pauta completa de vacinación.
Esta novidade fora introducida na guía de actuación ante a aparición de casos de covid-19 en centros educativos, aprobada na Comisión de Saúde Pública, pero non viña recollida explicitamente no protocolo educativo elaborado polas Consellerías de Educación e Sanidade.
No entanto, fontes do departamento dirixido por Román Rodríguez aseguraron Europa Press que esta excepción aos alumnos con pauta completa xa estaba contemplada polo protocolo de Sanidade e viña aplicando en Galicia, a pesar de que non vir recollida en documento educativo galego.
Deste xeito, segundo recolle a nova redacción do protocolo da Xunta, os convivientes dunha persoa con síntomas compatibles coa covid evitarán as interaccións sociais prescindibles ata que se confirme o resultado da proba.
Todo o alumnado ou persoal do centro que convivan cunha persoa positivia serán considerados contactos estreitos. En caso de non dispor de pauta de vacinación completa, terán que absterse de asistir ás instalacións educativas ata que se resolva a situación do caso sospeitoso.
A pesar diso, aquelas persoas que conten coa pauta de vacinación completa ou diagnosticadas con covid no últimos seis meses poderán acudir á escola ou ao seu posto de traballo "extremando sempre as medidas de prevención".
OUTROS CAMBIOS
O protocolo lembra a canle 'EduCovid' para a comunicación de datos básicos de contactos próximos daqueles casos confirmados, e establece que se considerará un brote nun centro a calquera agrupación de tres ou máis casos con infección activa con vínculo epidemiolóxico.
Sempre que se detecten tres casos ou máis nun centro nun período curto de tempo, en concreto menos de 14 días entre o primeiro e o último, terá que realizarse unha valoración da situación por parte das autoridades sanitarias en caso de requirir algunha actuación extraordinaria.
