Sanidade amplía aforamentos ao 90% en interiores para dar paso á "nova normalidade"

Galicia ampliará desde este sábado, 9 de outubro, o aforamento en interiores, así como as reunións en locais de hostalaría a 10 persoas dentro e 20 en exterior --agora están en oito e 15, respectivamente--, mentres que non hai cambios en canto ao lecer nocturno. Así o anunciou este martes o conselleiro de Sanidade, Julio García Comesaña, para informar do acordado polo comité clínico na súa reunión deste luns pasado, quen destacou que Galicia se atopa en "risco controlado" e entra en niveis de "nova normalidade".

Por iso, Comesaña valorou que a situación permite "maior apertura e desescalada" coa ampliación de aforamentos do 75 ao 90 por cento, con algunha excepción. Entre outros, os espectáculos artísticos e musicais pasan do 75 ao 90 por cento en público sentado e de pé do 33 ao 66%. En zonas comúns de hoteis, por exemplo, aumenta do 50 ao 75%; en albergues pasa do 50 ao 75%; e no transporte público mantense o 100% en prazas sentadas e aumenta ao 75% nas de pé.

EXCEPCIÓNS

Por iso, Comesaña valorou que a situación permite "maior apertura e desescalada" coa ampliación de aforamentos do 75 ao 90 por cento, con algunha excepción.

En concreto, comercios, academias, lugares de culto, congresos, lugares de culto e instalacións deportivas pasan desde este sábado do 75 ao 90 por cento de aforamento e elimínanse o número máximo de grupos de persoas como en ximnasios.

En canto aos espectáculos musicais e artísticos en interior aumentan en público sentado do 75 ao 90 por cento; mentres que en asistentes de pé permitirase o 50%.

No caso dos espectáculos musicais e artísticos ao aire libre, pasarase do 75 ao 90 por cento con asistentes sentados, mentres que con público de pé aumentará do 33 ao 66 por cento. Comesaña fixo fincapé en que, ademais, eliminarase o número máximo de persoas de 5.000 xa que, con carácter xeral, os límites máximos "desaparecen".

HOSTALARÍA SEGURA

En canto a hostalaría segura, o conselleiro de Sanidade explicou que se ampliará de oito a 10 as reunións de persoas en interior e de 15 a 20 en terraza.

En canto aos aforamentos, no caso dos establecementos de hostalaría cunha cuncha pasarán do 50 ao 75 por cento en interior e do 75 ao 90% en exterior.

E os que teñen dúas cunchas, cun "compromiso máis alto", concretou Comesaña, soben os aforamentos do 75 ao 90 por cento en interiores e mantense o 100 por cento en terraza.

LECER NOCTURNO

Con todo, no caso do lecer nocturno, manifestou que o comité clínico deste luns decidiu non facer "ningún cambio" por ser a actividade de "máis risco". "Deixámolo como está", afirmou, para lembrar que o seu protocolo entrou en vigor o fin de semana pasado.

Con todo, Comesaña incidiu en que en 15 días o comité clínico, en función da evolución epidemiolóxica, se se manteñen os "bos" datos actuais, "seguirá ampliando aforamentos" para chegar ao "100% da capacidade" nos ámbitos nos que se establece o 90%.