Por E.P. | Ourense | 08/10/2021 | Actualizada ás 18:55
A Sala do Civil e Penal do Tribunal Superior de Xustiza de Galicia (TSXG) confirmou a condena de oito anos de cárcere e cinco anos de liberdade vixiada que a Audiencia Provincial de Ourense impuxera a un mozo de 21 anos que abusou sexualmente da súa sobriña, de 13.
O fallo do alto tribunal galego, con data a 4 de outubro, confirma como probado que o acusado, o día de Noiteboa de 2018, aproveitou que a menor se ía a deitar e que ambos durmían en habitacións contiguas na casa dos pais para entrar no seu cuarto, introducirse na súa cama e tocala por todo o corpo.
A continuación, describe a sentenza orixinal da Audiencia Provincial, penetrouna vaxinalmente "sen que a menor opuxese resistencia pola vergoña que lle daba o que estaba a ocorrer ou polo medo que tiña ao seu tío".
Tras este fallo, a defensa do acusado presentou recurso de apelación ante o TSXG por "erro na apreciación das probas". E é que, ao seu xuízo, non se respectou o principio de presunción de inocencia durante a declaración da vítima e houbo falta de "coherencia interna" no seu relato.
Os maxistrados desestiman o recurso da defensa e advirten: "Parece non repararse en que a declaración dunha nena que foi obxecto dun abuso sexual, efectuada ante unha Sala de xustiza, non conta co mellor escenario para mostrar a seguridade que tanto bota en falta".
Ademais, o TSXG sinala que o informe psicolóxico forense realizado á menor consta que "é unha persoa vulnerable, con baixa autoestima" e cunha "pobre rede de apoio familiar", todos eles "factores que limitan a súa capacidade para decidir de maneira voluntaria". "Así que nada ten de raro que haxa que sacarlle as respostas e dirixir o interrogatorio", conclúen os maxistrados.
Por todo iso, o TSXG desestima o recurso de apelación e confirma na súa integridade a condena de oito anos de cárcere e cinco de liberdade vixiada para o acusado, así como a prohibición de achegarse á vítima a menos de 300 metros do seu domicilio, o seu colexio, o seu lugar de traballo ou calquera punto onde se atope durante 10 anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.