Ollo a camioneiros e autobuses... a DGT intensificará a vixilancia sobre eles a vindeira semana
Controlaranse autobuses e todo tipo de camións, independentemente do país no que estean matriculados.
Por Europa Press / Redacción | PONTEVEDRA | 09/10/2021 | Actualizada ás 19:31
A Dirección Xeral de Tráfico (DGT) intensificará a vixilancia de camións e autobuses na provincia de Pontevedra entre os días 11 e 17 de outubro.
Nun comunicado, a Subdelegación do Goberno na provincia detallou que, durante eses días, os axentes da Agrupación de Tráfico da Garda Civil estarán presentes nos diferentes tipos de vías da provincia para realizar inspeccións sobre os vehículos e sobre os condutores.
Tal e como sinalou a subdelegada, Maica Larriba, controlaranse autobuses e todo tipo de camións, independentemente do país no que estean matriculados, incidindo na vixilancia e control de aspectos como a velocidade á que circulan, as horas de condución e descanso, o tacógrafo, o exceso de peso, os defectos técnicos do vehículo, etc.
"A pesar de que o 68% do parque de vehículos no noso país son turismos, o transporte de mercadorías (camións e furgonetas) ten un peso importante na seguridade viaria, xa que representa o segundo tipo de vehículos máis numeroso que circula polas estradas (14% do total do parque) e están implicados no 16% dos accidentes con vítimas ocorridos no ano 2019", sinalou.
Pola súa banda, o parque de autobuses representa ao redor do 0,2% do total do parque automobilístico e están implicados no 2% dos accidentes con vítimas. Segundo a Subdelegación, este dato, unido a un maior índice de letalidade no caso de accidentes con vehículos de mercadorías de máis de 3.500 quilos, é o que leva á DXT a pór en marcha esta nova campaña de vixilancia.
