Santiago rexistra un fin de semana "sen grandes conflitos" nocturnos, a pesar do aumento de visitantes
A Policía Local detén na noite do sábado a un home que arrastraba á súa suposta noiva baixo os efectos do alcol
Por E.P. | SANTIAGO DE COMPOSTELA | 11/10/2021 | Actualizada ás 15:12
Santiago de Compostela rexistrou unha fin de semana "sen grandes conflitos" no que respecta ás incidencias nocturnas, a pesar de que aumentaron os turistas e persoas de municipios dos arredores que visitaron a cidade con motivo da ponte, tal e como destacou o alcalde, Xosé Sánchez Bugallo.
De feito, o parte de incidencias da Policía Local apenas rexistra dous desaloxos de aglomeracións ás saídas de dúas discotecas o sábado, cunhas 200 persoas en cada caso.
Outro incidente destacado desa mesma noite é a detención dunha persoa ao redor da 01,40 horas da madrugada do domingo. De acordo co relato da Policía, trátase dun home que arrastraba por Praza Roxa á súa suposta noiva, que "presuntamente se atopaba baixo os efectos do alcol e inconsciente".
Nese momento, solicitouse unha ambulancia para o seu traslado ao Complexo Hospitalario Universitario de Santiago (CHUS). O home detido "en todo momento proferiu insultos e ameazas" aos alí presentes e causou danos a un vehículo, chegando a romperlle as lentes ao seu condutor.
Ademais, na noite do sábado ao domingo identificouse a tres persoas por consumir alcol na vía pública no Cantón de San Bieito e a outra por ouriñar na rúa Alfredo Brañas.
No que respecta á noite do venres, a Policía abriu dilixencias pola caída dun mozo que saltou dun muro a outro no Parque de Belvís pouco antes das 7,00 da mañá do sábado. Esta persoa necesitou ser trasladada ao CHUS. A maiores, sobre as 4,55 horas, identificouse a un individuo por ouriñar na rúa Conga.
En canto a festas en pisos, os axentes tiveron que intervir nun total de cinco ao longo do fin de semana: unha na noite do venres, tres na do sábado e unha na do domingo.
"MOITOS TURISTAS E XENTE DA CONTORNA"
Ao fío de todos estes datos de incidencias, o alcalde, na súa rolda de prensa habitual dos luns, valorou que fose un fin de semana "sen grandes conflitos", despois dun xoves noite de "problemas habituais cos estudantes", aínda que "en número menor" a outras semanas.
"Simplemente, o que estamos a ver é que a nosa mocidade ten unhas grandes ganas de festa e que os sábados está a vir moita xente da contorna de Santiago a pasar o fin de semana. Este sábado era bastante impresionante", asegurou.
Así, explicou que xa "non eran estudantes" unicamente, senón "moitos turistas e xente da contorna". "Iso leva elementos positivos e algunhas complicacións", recoñeceu Bugallo.
