Galicia, á cola das comunidades con maior poder adquisitivo para a compra de vivenda de obra nova
Con todo, a crise derivada da Covid-19 supuxo un incremento do aforro nos fogares galegos destinado á adquisición de residencia.
Por Europa Press / Redacción | SANTIAGO DE COMPOSTELA | 13/10/2021 | Actualizada ás 11:34
O aforro das familias incrementou o seu orzamento ata os 150.663 euros en Galicia para a adquisición de vivendas de obra nova, aínda que esta cifra sitúa á comunidade á cola das comunidades con maior poder adquisitivo para este tipo de demanda.
Despois de ano e medio desde o estalido da pandemia, os estudos do portal especializado en cooperativas de vivendas LACOOOP rexistran un aumento no orzamento das familias para a compra de inmobles, que alcanza unha media estatal de demanda de nova construción de 191.148 euros, o que supón un incremento de 7.500 euros respecto ao ano anterior.
"Desde 'lamadredelascooperativas' cremos que o descenso no gasto de lecer, hostalaría e viaxes sumado á incerteza dos consumidores, debida á recesión económica causada pola covid, supuxeron un incremento do aforro dos fogares galegos destinado á adquisición de residencia aínda estando á cola doutras comunidades", explica Mónica Abril, responsable de LACOOOPEstudios.
En canto ao resto de comunidades, Baleares (283.050 euros), País Vasco (272.000) e Madrid (261.800) son as que rexistran maior poder adquisitivo á hora de escoller vivenda de obra nova. Tras Galicia, quedan á cola Castela e León con 145.161 euros e Murcia (109.650).
Con respecto ás preferencias dos usuarios por adquirir vivendas de obra nova ou de segunda man, Galicia é unha das comunidades que reflicte unha repartición máis igualitaria: o 52 por cento decántase por inmobles de nova construción fronte ao 48 por cento que opta por residencias de segunda man.
En canto ao resto de comunidades, Valencia (71%) representa o caso máis notable de usuarios que se decantan pola adquisición de obra nova debido ao incremento no volume de proxectos e novas áreas de construción, seguido por Cataluña (69%) e Madrid (59%).
No lado contrario, son remarcables os casos de Canarias, que rexistra un 89% en compra de vivendas de segunda man, Navarra (77%), Estremadura (77%), A Rioxa (71%), Asturias (71%) e Aragón (67%).
Segundo Mónica Abril, "tanto o aumento da media nacional no orzamento á hora de adquirir vivenda como o incremento das preferencias das familias por compra de nova construción correspóndense cos índices en investimento inmobiliario nacional, que apuntan xa a unha leve recuperación da confianza das economías domésticas".
