EU elixe a un catedrático e a unha investigadora para as listas de IU
Xosé Luis Outes, obtivo o 34,70% dos votos dos militantes e Saínza Ruíz, o 18% dos militantes desta formación en Galicia.
Por Galicia Confidencial | Vigo | 18/02/2014 | Actualizada ás 16:00
Esquerda Unida xa ten o seus candidatos para presentar á federal de IU e configurar, así, a lista que esta formación estatal presentará ás eleccións europeas. Trátase de Xosé Luis Outes, catedrático de Teoría Económica na Universidade de Vigo e Saínza Ruíz, fisioterapeuta e investigadora de posgrao.
A elección destes dous candidatos celebrouse en asembleas deliberativas xunto con outro referendos para o debate e aprobación do programa marco das eleccións europeas. Segundo suliña EU nun comunicado, as asembleas convocadas en todas as comarcas, "tiveron un amplo debate e participación".
"Dende Esquerda Unida, temos a vontade de elaborar de xeito colectivo e horizontal o programa co que nos queremos presentar ás europeas. Ante o convencemento de que a alternativa da esquerda transformadora é posible e que sen participación non hai democracia, estamos certos de que a elaboración programática debe ser unha achega da cidadanía e dos movementos e colectivos sociais comprometidos polo cambio social", apunta este partido.
Neste proceso participou o 63% da militancia de Esquerda Unida que elixiu a dúas persoas das 13 presentadas a dito proceso. Destas 13 persoas, 7 foron homes e 6 mulleres. Máis da metade dos candidatos eran mozos e mozas menores de 30 anos. Con todo, o máis votado foi Xosé Luís Outes, co 34,70% dos votos. Saínza Ruíz obtivo o 18% dos apoios.
Traxectorias
Xosé Luís Outes (Vigo 1943, xublilado), catedrático de Teoría económica da universidade de Vigo, un dos referentes fundamentais dos estudos económicos en Galicia sobre Banca Pública e Dinámica económica. Foi un dos economistas de Esquerda Unida activos nos anos 90 contra o acordo de Maastrich e as políticas económicas do BCE.
Saínza Ruíz (Ferrol 1990) moza de Ferrol, diplomada en Fisioterapia pola universidade da Coruña onde realiza o posgrao de especialización. É a coordinadora da área de sanidade local de Ferrol.
