O investimento de Adif Alta Velocidade en Galicia para o ano que vén será de 390 millóns
Entre outras partidas, o proxecto de contas xerais para 2022 reserva 8,65 millóns para sufragar a supresión da peaxe dos movementos O Morrazo-Vigo e A Coruña-A Barcala da AP-9.
Por E.P. | SANTIAGO DE COMPOSTELA | 13/10/2021 | Actualizada ás 20:40
O investimento de Adif e de Adif Alta Velocidade en Galicia prevista no proxecto dos orzamentos xerais do estado para o ano que vén sitúase en 389,69 millóns de euros, unha vez concluídas as principais obras do AVE á comunidade.
Así o recolle o anexo de investimentos reais para 2022 e programación plurianual anualizada, que contempla 286,58 millóns de euros no referente a Adif (5,1 millóns na Coruña, 250,26 en Lugo, 14,56 en Ourense e 16,66 en Pontevedra) e 103,11 en Adif Alta Velocidade (8,85 millóns na Coruña, ningunha partida en Lugo, 83,69 millóns en Ourense e 10,57 en Pontevedra).
Así, para A Coruña, outras partidas son os 16,5 millóns previstos por Enaire e 64,36 millóns de Portos do Estado. Mentres, a SEPI (sociedade estatal de participacións industriais) prevé 4,9 millóns para 2024 e 5,7 millóns para 2025 (ningunha partida para o ano que vén) para o denominado 'estaleiro 4.0' para Navantia.
En Lugo, Adif recolle unha partida de 15,8 millóns para o corredor noroeste entre Ferrol e Vegadeo e 5 millóns para a estación de Lugo. O total desta empresa ascende a 250,26 millóns con varias actuacións como as agrupadas baixo o epígrafe 'Rede Ten-T-Outras Actuacións', por 122,74 millóns.
Mentres, Ourense conta con 14,56 millóns de Adif e un total de 83,69 millóns procedentes de Adif Alta Velocidade, entre eles os 22,71 millóns para a variante de Ourense do AVE. Os 83,69 millóns inclúen tamén 10 millóns para a chegada do AVE entre Olmedo-Lubián e Ourense.
Por último, no tocante a Pontevedra, son 16,66 millóns os que recibe de investimento de Adif, incluídos 10,4 para o Corredor Noroeste na súa apartado electrificación Vigo a Tui, e outros 10,57 de Adif Alta Velocidade, que inclúen 98.000 euros para a variante Ourense-Vigo por Cerdedo.
Entre outras partidas, o proxecto de contas xerais para 2022 reserva 8,65 millóns para sufragar a supresión da peaxe dos movementos O Morrazo-Vigo e A Coruña-A Barcala da AP-9.
Tamén unha subvención directa á Xunta pola gratuidadde a conexión da AG-55 co acceso ao Porto Exterior da Coruña (por 272.000 euros) e outra (por 300.000) para obrigacións de exercicios anteriores.
