Por Europa Press / Redacción | A CORUÑA | 18/10/2021 | Actualizada ás 13:57
O delegado do Goberno, José Miñones, cifrou en 21 millóns a transferencia do Executivo central á Xunta do Plan de Recuperación, Transformación e Resiliencia para desenvolver este ano o Plan de Modernización da Formación Profesional. Esta cantidade, sinala, permitirá en Galicia, entre outras actuacións, a creación de case 3.500 prazas educativas e a formación de 1.572 profesores e profesoras.
O Boletín Oficial do Estado publica este luns a resolución do Ministerio de Educación e Formación Profesional que materializa a distribución para este ano dos fondos do Mecanismo de Recuperación, Transformación e Resiliencia dedicados ao impulso do Plan de Modernización da Formación Profesional.
Nesta distribución, José Miñones remarcou que a Xunta recibe 6,56 millóns de euros para o redimensionamento da oferta formativa de Formación Profesional durante o curso 2021-2022, coa creación de 3.484 prazas.
OUTRAS ACHEGAS
O delegado tamén puxo de relevo a aposta polo desenvolvemento do novo sistema de avaliación e acreditación permanente de competencias básicas e profesionais. Galicia recibe nesta anualidade 7,2 millóns de euros co que se prevé acreditar as competencias de máis de 27.800 traballadores e traballadoras este ano.
Ademais, detallou que a resolución do Ministerio de Educación tamén recolle fondos destinados á conversión de ciclos de grao medio e grao superior en bilingües. Para o presente exercicio económico, o Ministerio achega á Consellería de Educación seis millóns de euros "cos que poderá crear en Galicia 45 grupos de alumnos con educación bilingüe".
A distribución de fondos tamén recolle a conversión de aulas en espazos de tecnoloxía aplicada cun investimento para este ano de 772.775 euros. Neste exercicio actuarase sobre 14 aulas en Galicia.
O Ministerio tamén asigna este ano a Galicia outros 300.000 euros á creación de 28 aulas de emprendimiento. En canto á liña relativa á formación en dixitalización e sustentabilidade aplicada aos sectores produtivos, asígnase a Galicia 155.545 euros para a formación de 1.572 docentes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.