BNG e PSdeG ven electoralista a proposta de Feijóo de reforma do financiamenteo autonómico

A convocatoria do encontro de presidentes lanzada polo titular da Xunta, Alberto Núñez Feijóo, a pasada semana mantén aberto o debate sobre a reforma do modelo de financiamento autonómico entre as forzas políticas galegas, que discrepan sobre a forma na que debe abordarse unha cuestión que PP, BNG e PSdeG comparten que non pode continuar dilatándose tras permanecer en suspenso desde mediados da década pasada.

Nas roldas de prensa celebradas este luns, os grupos manifestaron as súas diferenzas ante a convocatoria a celebrar un encontro en Santiago o próximo 2 de novembro que realizou o mandatario galego e que espertou receos entre os gobernos autonómicos presididos polo PSOE por entender que podería derivar na configuración dunha "fronte" contra o Goberno e outras comunidades.

Unhas dúbidas que foron reiteradas polo secretario xeral dos socialistas galegos, Gonzalo Caballero, que convidou a Feijóo a explicar se a súa proposta "vai en positivo" e pretende "mellorar" a repartición de fondos ou se parte dunha "formulación en negativo" para facer "frentismo" ante o Goberno "en liña coa estratexia" do Partido Popular.

Fronte a isto, o portavoz dos populares na Cámara, Pedro Puy, incidiu en que se trata dunha convocatoria que busca "avanzar" para que as comunidades que "comparten problemas" como a dispersión poboacional ou o envellecemento acorden propostas para levalas á Conferencia de Presidentes.

E é que, para Puy, acordar propostas entre comunidades con problemas compartidos "facilitaría o diálogo" entre os presidentes das 18 autonomías na Conferencia de Presidentes, un órgano que, ao seu xuízo, "non debe converterse en meras sesións informativas" e teñen que contar "con traballo previo". Por tanto, negou que a proposta lanzada polo Goberno galego pretenda "facer frontes de políticas partidarias" senón que vai na liña dun modelo de "cogobernanza e participación" que, segundo Puy, "é propio dun Estado de corte federal" como o español.

BNG RECLAMA UN DEBATE NO PARLAMENTARIO

"Nun debate tan importante, o primeiro debería ser falar aquí no Parlamento. O raro é que se fale antes cunha persoa que vive en Castela e León que cun galego", espetou a líder do BNG, Ana Pontón, que manifestou a discrepancia dos nacionalistas con que "despois de sete anos sen coñecer unha proposta" da Xunta para a reformulación do modelo de financiamento, Feijóo convoque un foro de presidentes para abordalo.

Unha proposta coa que, para Pontón, Feijóo pretende obter "unha foto" e continuar na senda de facer "oposición á oposición", polo que instou ao mandatario popular a abandonar esa vía e expor o debate sobre financiamento no propio Parlamento.

"Temos moi claro que o foro en que se ten que debater esta cuestión é o Parlamento de Galicia. Parece que se pode falar con todo o mundo menos co pobo de Galicia", aseverou a portavoz nacional do BNG, que cre que "nun debate tan importante, o primeiro debería ser falar aquí".

Por tanto, defende que a formación frontista ten outras propostas para dotar de "maior autonomía fiscal e financeira" a Galicia e que pasan por "ampliar" a porcentaxe de impostos cedidos (IVE e IRPF) ata o 90%, o que, di, traduciríase nun aumento dos ingresos "de 4.000 millóns de euros".