Por Europa Press / Redacción | SANTIAGO DE COMPOSTELA | 19/10/2021 | Actualizada ás 13:48
O secretario xeral do PSdeG, Gonzalo Caballero, asegurou "desconfiar" das rebaixas fiscais anunciadas polo presidente da Xunta, Alberto Núñez Feijóo, na presentación dos orzamentos autonómicos para 2021 ao considerar que a súa política é a de "dicir que el convida" pero paga o Goberno central.
Así se pronunciou en declaracións aos medios nun acto en Santiago de Compostela e preguntado polas rebaixas fiscais que incorporan as contas galegas, como a do tramo autonómico do IRPF (imposto sobre a renda das persoas físicas). "Queremos estudalas ao detalle pero o que sei é que o Goberno de España manda a Galicia 1.000 millóns e que Feijóo di que baixa os impostos", sostivo para argumentar que as políticas de Feijóo sobre as de "dicir que el convida pero paga o Goberno central".
Fronte a iso, asegurou que a política de facenda hai que facela "pensando na xente". "Non se pode facer política de impostos para beneficiar aos millonarios como Feijóo fixo cando baixou o imposto de patrimonio pensando nos poderosos e non na xente do común", afirmou.
Gonzalo Caballero subliñou que "fortalecer o público é necesario para reactivar Galicia", para "saír da etapa de pandemia". "E para iso é necesario que haxa políticas impositivas progresivas que recaden máis a aqueles que máis teñen, que permitan a través dos servizos públicos pór en marcha un escudo protector", indicou.
Ademais, o dirixente socialista censurou que, ao longo dos 12 anos de Goberno de Feijóo, os orzamentos da Xunta convertésense en "simplemente axustes contables". "Porque Galicia careceu de política económica para impulsar a xeración de emprego e a modernización do noso país", dixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.