Ames celebra a súa primeira Feira do Monte para amosar a riqueza en produtos das súas fragas

Haberá xornada de portas abertas de gandería extensiva, exposicións de cogomelos, colmeas antigas e modernas, panais e instrumentos de apicultura ou presenza de artesáns da cestería e da madeira.

Por Galicia Confidencial | Compostela | 19/10/2021 | Actualizada ás 21:15

Comparte esta noticia

A parroquia de Transmonte acolle esta I Edición da Feira do Monte “Monte Tanto”, un evento co que se pretende valorizar e difundir a importancia social, ambiental, cultural e económica do monte. Produtores e profesionais que traballan este eido congregaranse na xornada deste sábado para dar a coñecer "todo o que de si poden dar as fragas cando se coidan". A feira comezará ás once e media da mañá e finalizará ás sete e media da tarde. Segundo indican dende a concellaría de Medio Amiente do Concello de Ames, área organizadora, o obxectivo do evento é "valorizar e dar importancia á diversidade das fragas mixtas e amosar a gran variedade de produtos que obtemos delas".

Cogomelos
Cogomelos | Fonte: EP

En concreto, na Feira "Monte Tanto" haberá unha xornada de portas abertas de gandaría extensiva exposicións de cogomelos, colmeas antigas e modernas, panais e instrumentos de apicultura e pequenos froitos, presenza de artesáns da cestería e da madeira, mostra dos cereais que se poden cultivar no monte e degustacións de froitos e aceites.

Para Manuel Lens, concelleiro de Medio Ambiente, a Feira nace cunha clara vocación de continuidade: “Queremos que esta sexa a primeira de moitas feiras; consideramos que poñer en valor o monte, dar a coñecer as súas posibilidades de explotación e amosar como se lle pode sacar rendemento son cuestións que probablemente contribuirán a que as nosas fragas estean mellor coidadas e, en consecuencia, teñan menos perigo, por exemplo, de ser pasto de lumes ou de abandono”.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta