Formoso: "Non volverá haber unhas primarias á medida do secretario xeral do PSdeG"

O candidato á Secretaría Xeral do PSdeG Valentín González Formoso presentou este mércores un decálogo de propostas para "sumar e avanzar" no PSdeG, dez medidas que centrarán a súa campaña ata o próximo día 30, xornada na que se celebrarán as primarias.

Entre estas propostas, conforme sinalou a súa candidatura, destaca o compromiso de que os procesos de primarias se celebren "con tempo suficiente" para que calquera militante poida presentar as súas propostas e alternativas, "facilitando a participación de calquera militante que queira mellorar o partido e Galicia". "Non volverá haber unhas primarias á medida do secretario xeral", afirma Formoso.

Formoso destacou que "este conxunto de medidas incide na mellora da participación, a reconexión coa sociedade, o emprego e a industria como eixos prioritarios, a aposta pola igualdade, a recuperación do talento e a defensa dos intereses de Galicia".

Así mesmo, propón a convocatoria dunha conferencia de política anual para elaborar propostas estratéxicas para Galicia, que permitirá pór o talento da militancia socialista a disposición do país e onde o emprego e a industria centrará boa parte da acción política do PSdeG.

O tamén secretario xeral do PSOE coruñés avoga pola elaboración dun plan de revitalización e fortalecemento do PSdeG, co obxectivo de impulsar o crecemento do número de militantes nas agrupacións socialistas de Galicia, a posta en marcha dunha coordinadora nacional de organización, o fortalecemento dos equipos de apoio e asesoramento xurídicos e urbanísticos e a creación de, polo menos, 10 grupos sectoriais de traballo nos que participarán militantes, simpatizantes e profesionais de diferentes sectores para elaborar propostas en distintas áreas (como a sanidade, a educación, as políticas sociais, o feminismo e a igualdade, etc.).

Formoso tamén se compromete a elaborar unha proposta de carta de servizos á cidadanía a implementar na Xunta cando o PSdeG goberne e a construír, nos seis primeiros meses de mandato, un Consello Nacional de Política Municipal, no que terán cabida alcaldes e alcaldesas, así como portavoces na oposición, co obxectivo de coordinar as políticas locais.

Un dos principais obxectivos de Formoso, segundo indicou, é o de conseguir que volva todo o talento dos miles de mozos que tiveron que emigrar na procura de oportunidades laborais e, para iso, elaborará un plan de retorno do talento galego que incluirá o fomento dunha contorna de coñecemento e oportunidades para que Galicia poida aproveitalo.

Entre o resto de medidas deste decálogo para "sumar e avanzar" atópase a aprobación dun 'Manifesto Socialdemócrata e Galeguista do Socialismo Galego', a posta en marcha dunha mesa de análise para elaborar unha proposta sobre o novo modelo de financiamento autonómico, o establecemento dunha alianza estratéxica cos sindicatos de clase ou o deseño dunha estratexia nacional de igualdade no PSdeG.