A industria eleva a súa facturación un 5,6% en agosto, un terzo do que crece a media
Faino respecto ao mesmo mes de 2020, marcado pola crise da Covid.
Por Europa Press / Redacción | SANTIAGO DE COMPOSTELA | 21/10/2021 | Actualizada ás 10:31
A cifra de negocios da industria galega subiu un 5,6% en agosto respecto ao mesmo mes de 2020, taxa que supón un terzo do que crece a media (+17,1%), segundo os datos que publica este xoves o Instituto Nacional de Estatística (INE). De media do que vai de ano, a facturación do sector na comunidade acumula un incremento do 17,7%.
No conxunto estatal, a cifra de negocios da industria subiu un 17,1% en agosto respecto ao mesmo mes de 2020, taxa 6,5 puntos superior á de xullo pero 50 puntos inferior á de abril, cando se rexistrou o maior repunte de toda a serie histórica.
Co avance de agosto, a facturación da industria suma seis meses consecutivos de ascensos tras encadear anteriormente un ano de taxas interanuais negativas pola crise da covid.
En termos mensuais e en datos corrixidos de estacionalidade e calendario, a industria rexistrou en agosto un aumento das súas vendas do 2,3%, a súa maior alza mensual desde o pasado mes de marzo.
