A participación nas oposicións do Sergas deste sábado alcanza o 76%

Un total de 1.147 aspirantes acudiron este sábado ao recinto da Feira Internacional de Galicia, en Silleda, ás probas da oferta pública de emprego do Sergas --iniciadas o 18 de setembro--, o que supón o 76% das 1.494 persoas convocadas.

Este fin de semana realizaranse os exames para cubrir 190 prazas. Este sábado estaban convocadas as persoas aspirantes a cubrir 86 prazas de técnico en farmacia, mentres o domingo están convocadas 1.522 aspirantes da categoría de técnico superior en laboratorio de diagnóstico clínico para cubrir 104 prazas. Coa realización destes exercicios concluirán as probas selectivas para cubrir 1.311 prazas de 48 categorías/especialidades de persoal sanitario licenciado e técnico, que se iniciaron o 18 de setembro e que se desenvolveron ao longo de oito xornadas de exame.

Como en anteriores procesos selectivos, reforzáronse as medidas de seguridade coa posta a disposición dos tribunais de selección dunha plataforma para a elaboración de cada un dos exercicios da fase de oposición, co que se garante o seguimento de todo o proceso, así como a selección aleatoria e automatizada das preguntas do exame.

Oposicións ao Servizo Galego de Saúde (Sergas) celebradas o 26 de setembro de 2021 no recinto da Feira Internacional de Galicia, en Silleda (Pontevedra).. XUNTA | Fonte: Europa Press