O PSdeG acusa á Xunta de "reducir" partidas para primaria e saúde pública: "O PP é un risco para a sanidade"

O portavoz parlamentario do PSdeG, Gonzalo Caballero, acusou á Xunta de reducir as partidas para a Atención Primaria e a saúde pública no proxecto de orzamentos autonómicos para 2022 polo que advertiu de que o Partido Popular "é un risco para a sanidade pública galega".

Nunha rolda de prensa celebrada este luns na Cámara galega e coincidindo co arranque das comparecencias dos membros do Goberno galego para debullar as contas no Lexislativo, Gonzalo Caballero censurou tamén que a Xunta pretenda "rescindir contratos" a profesionais da sanidade que foron contratados para reforzar o sistema durante a pandemia.

"O Partido Popular é un risco para a sanidade pública que os galegos non podemos permitir", sostivo o dirixente socialista, que avanzou que o PSdeG vai defender todas as emendas necesarias para que o Partido Popular cambien a súa actitude coa sanidade. "A medida que grazas á vacina pasamos as peores etapas da pandemia, o Goberno do PP recorta, despide e dana a sanidade pública galega", incidiu.

Neste sentido, censurou que os populares galegos sigan apostando por un modelo de "non presencialidade", de atención telefónica na que "corresponde a un administrativo decidir cando un paciente ten que ter unha atención presencial ou simplemente telefónica".

"Con este tipo de medidas, o Goberno da Xunta demostra que non está á altura do que Galicia necesita", incidiu Gonzalo Caballero, que contrapuxo a actitude do PP co "compromiso claro" que a súa formación ten cos profesionais sanitarios, que saben que "é necesario ter máis presupostos en sanidade".

O portavoz parlamentario do PSdeG, Gonzalo Caballero, tras a rolda de prensa na Cámara galega. PSDEG | Fonte: Europa Press