O partido do ex-socialista Pachi Vázquez acusa o PSOE do Carballiño de "malgastar" 90 millóns e pedirá unha auditoría

Espazo Común, o partido fundado polo ex secretario xeral do PSdeG Pachi Vázquez, anunciou que presentará unha moción no próximo pleno do Carballiño para solicitar que o concello encargue unha auditoría externa co fin de dirimir as contas municipais.

Pachi Vázquez denunciou que nos últimos sete anos "malgastáronse 90 millóns de euros" do diñeiro público por parte do goberno local do seu antigo partido, o Partido Socialista.

Vázquez trasladou a súa "fonda preocupación" pola situación municipal e criticou que "non se sabe en que se malgastou", pero "o que se sabe é que non hai nin unha obra de infraestrutura necesaria". "Nin centro de saúde, nin parque empresarial", apostilou Vázquez asegurando que "non viron nin un só euro".

Neste mesmo sentido, acusou o goberno municipal de "estar a maquillar" as contas e apuntou directamente ao rexedor, Francisco Fumega, para pedirlle que explique "onde está o diñeiro" reiterando que non houbo investimento en proxectos necesarios para a localidade.

"Quedan 17 meses, nin tempo nin diñeiro para as grandes obras", sentenciou Pachi Vázquez, quen afirmou que no seu mandato como alcalde (entre 1995 e 2005) si realizou infraestruturas. "Se saes á rúa sabes o que fixemos", apelou.

"O que non son contas, son contos; esta é unha cruzada para os próximos meses", advertiu Pachi Vázquez, quen anunciou que a súa formación levará ao próximo pleno unha moción para, co apoio do resto de grupos da oposición --espera--, reclamar unha auditoría municipal sobre o gasto realizado durante o mandato "que axude a saber onde están os millóns".