6.073 mulleres sufriron violencia de xénero en Galicia en 2020, un 1,27% máis que o ano anterior
Un 80,8% (4.912) teñen nacionalidade española e o 19,12% (1.161) son estranxeiras.
Por Europa Press / Redacción | Santiago de Compostela | 25/10/2021 | Actualizada ás 19:52
Un total de 6.073 mulleres sufriron violencia de xénero en Galicia en 2020, un 1,27% máis que o ano anterior, segundo reflicten as estatísticas dos órganos xudiciais recollidas na memoria da Fiscalía Superior de Galicia.
No seu informe anual, entregado ao Parlamento este luns polo fiscal superior de Galicia, Fernando Suanzes, o Ministerio Fiscal recolle o balance de vítimas de violencia de xénero segundo figura nas denuncias presentadas en 2020, un ano no que se produciron tres asasinatos machistas.
Estas cifras apuntan un aumento do 1,27% respecto ao ano 2019, que se traduce en 76 mulleres máis que sufriron violencia machista. En total, as estatísticas oficiais sitúan en 6.073 as vítimas de violencia machista en Galicia, o 4,17% do total de Esapaña.
En canto á súa distribución por nacionalidade, un 80,8% (4.912) teñen nacionalidade española e o 19,12% (1.161) son estranxeiras. Con todo, as cifras oficiais apuntan que case o 2% da poboación feminina estranxeira en Galicia sofre violencia de xénero, unha porcentaxe que se rebaixa ao 0,37% entre as mulleres de nacionalidade española.
Así as cousas, Fiscalía resalta este último dato como mostra de que o número de casos de violencia de xénero entre a poboación estranxeira é 18,59 veces maior en termos relativos en comparativa coas mulleres de nacionalidade española.
O ano da pandemia, que supuxo unha retardación nos procedementos xudiciais que afectou tamén o traballo de Fiscalía, concluíu cunha baixada de máis do 40% das sentenzas emitidas na área de violencia de xénero en comparación con 2019.
Deste xeito, o ano 2020 finalizou con 1.107 sentenzas (tanto condenatorias como absolutorias), case 900 menos que no ejercidio anterior. Destas, 805 foron condenatorias (42% menos), das cales, 254 foron sen conformidade e 451 por conformidade. Os 302 restantes, foron absolucións.
Outro dos aspectos que destacan do informe de Fiscalía no apartado de violencia de xénero é o aumento de case o 84% nas renuncias a continuar co proceso xudicial. Foron un total de 672, a maioría adoptadas por mulleres de nacionalidade española (case o 76%).
