Por E.P. | SANTIAGO DE COMPOSTELA | 26/10/2021 | Actualizada ás 12:03
O comité de empresa da planta das Pontes acusou á compañía de "prexudicar" aos traballadores co seu plan para reiniciar a central térmica da localidade coruñesa, para o que adquiriu recentemente carbón de face á reactivación do sistema. Nun comunicado, os representantes do persoal censuran a "total improvisación e indiferenza" que, din, leva a cabo a compañía cara a "o seu maior activo, o persoal".
"Saímos prexudicados de novo os traballadores e traballadoras tanto da central térmica das Pontes como no porto de Ferrol", incide o comité este martes. Critican que se executasen "unha chea" de traslados "innecesarios, cando non susceptibles de ser irregulares" que, sosteñen, provocaron "situacións dramáticas en familias da comarca chegando, nalgúns casos, a deixar a empresa".
O comité carga contra a dirección por "improvisar" unha modificación do calendario de quenda para os dous meses nos que prevé retomar a actividade nas Pontes. Advirten que esta situación carrexará "consecuencias na conciliación laboral e familiar" de persoal de Operación, "que a multinacional non quere completar na quenda a pesar de que é imprescindible para dar cumprimento á normativa laboral e lexislación vixente".
Así as cousas, e tras subliñar o respaldo do comité aos proxectos presentados por Endesa como alternativas ao peche da térmica, denuncian os "malos tratos" que, ao seu xuízo, comete a empresa cos seus empregados e apela ás administracións a intervir.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.