Unha sentencia podería frear os parques eólicos de Noruega en Galicia

Varios meses despois das primeiras denuncias pola "avalancha eólica" que asolaga Galicia, comezan a xurdir as primeiras reaccións das autoridades para poñer coto ao proceso. No caso galego, a Xunta anunciou a pasada semana unha moratoria de ano e medio aos novos parques eólicos, se ben esta vén cargada dunha letra pequena que, na práctica, deixará en mans do executivo autonómico que proxectos aprobar ou non. 

O outro golpe ao impulso eólico da comunidade vén de moitos quilómetros ao norte: Noruega. O país dos fiordos fixo as súas particulares incursións na eólica galega con varios proxectos de maior ou menor tamaño tramitados a través da empresa pública Statkraft. Estes xa recibiron multitude de críticas por parte do movemento ecoloxista e veciñal de Galicia: "nos fiordos non poñen muíños", resumiu unha fonte meses atrás ao Galicia Confidencial. 

Agora, unha sentencia da Corte Suprema de Noruega podería deixar no aire os proxectos de Statkraft. O fallo, coñecido días atrás, ditaminou que a instalación duns parques eólicos nunha zona rural do país vulneraba os dereitos da poboación local en tanto que lles impedía seguir desenvolvendo o seu modo de vida orixinal, vencellado ao pastoreo de renos. 

Precisamente, esa é unha das denuncias máis recorrentes da banda das plataformas que, dende hai meses, se mobilizan contra a instalación de eólicos en Galicia: que os novos parques aeroxeradores dificultan ou impiden o modelo de vida agrario desenvolto en moitas das paraxes ameazadas polos eólicos. Queda por ver se a Corte Suprema de Noruega aplicará o mesmo baremos aos habitantes do seu país e os foráneos.