Por Europa Press / Redacción | Santiago de Compostela | 29/10/2021 | Actualizada ás 16:36
O Goberno uruguaio decretou esta semana a intervención, por un prazo máximo dun ano, da institución mutual médica Casa de Galicia, creada por emigrantes galegos máis dun século atrás, en 1917. O motivo que alega o Ministerio de Saúde Pública do país para xustificar o paso é o "alto nivel de endebedamento" e os anos de perdas acumulados a pesar das axudas recibidas.
A entidade solicitara concurso de acredores e a súa directiva, que encabeza Alberto Iglesias, non escatimou en críticas cara á actitude gobernamental, co foco no ministro de Saúde, Daniel Salinas. A intervención, segundo informou o Goberno, leva o desprazamento das autoridades da institución mutual, a cal, ademais, tiña previstas eleccións para este domingo.
Nun comunicado, a directiva defende que asumiu a súa función en outubro de 2018 "nunha situación moi comprometida" cun endebedamento de máis de 64 millóns de dólares e cun patrimonio negativo de 7,7 millóns de dólares, o que levou aos auditores independentes da Institución a "cuestionar o principio de empresa" en marcha de Casa de Galicia.
Adicionalmente, subliñan que debía abonar no curto prazo obrigas salariais e de cargas sociais "sen ter recursos para honrar as obrigas de referencia".
Engade que, a pesar de todo, realizou "inxentes esforzos" para transformar a institución e tratar de mellorar os seus resultados, incluíndo a realización dunha auditoría da xestión médica en febreiro de 2019 por parte da Consellería de Sanidade da Xunta de Galicia, por mor da que se efectuaron cambios.
A directiva vincula que é a falta de resposta do Ministerio de Saúde uruguaio ás súas demandas de axuda o que provocou o paso do concurso de acredores, previo á intervención.
SEIS EXERCICIOS CONSECUTIVOS DEFICITARIOS
Pola súa banda, o Ministerio de Saúde Pública do país sostén que o obxectivo do Goberno é "garantir a debida asistencia médica dos usuarios da institución", así como adoptar "todas as medidas que estean ao seu alcance, para garantir a protección dos postos de traballo".
Engade que, desde decembro do ano 2020, "está a realizarse un seguimento exhaustivo da institución", dada a súa preocupante situación económica-financeira; e que nos últimos cinco anos a institución perdeu o 20% dos seus afiliados. Tamén esgrime o Ministerio que os últimos seis exercicios consecutivos Casa de Galicia presentou un balance deficitario, o que "evidencia severos problemas de xestión".
O Ministerio tamén esgrime as súas propias cifras e apunta que a entidade, segundo os seus últimos estados contables, "presenta un alto nivel de endebedamento, que ascende a 76 millóns de dólares, superando catro veces a media de endebedamento por afiliado do sector".
E remarcou que, fronte ás queixas da directiva, o Goberno si realizou "un significativo esforzo económico, concedéndolle na última década, en dúas oportunidades, facilidades de acceso a créditos a través do Fondo de Garantía IAMC, pola suma de 46 millóns de dólares". "A pesar do apoio económico recibido (a última vez en decembro de 2019), a institución non cumpriu a maior parte das metas propostas nos plans presentados", incidiu.
"CASA DE GALICIA TEN QUE SER CASA DE GALICIA"
Preguntado por este paso, ao termo da reunión semanal do seu Executivo, o titular da Xunta, Alberto Núñez Feijóo, asegurou que o confía na palabra do presidente uruguaio, Luís Lacalle Pou, quen defendeu a vía elixida (a intervención temporal) para evitar unir Casa de Galicia con outros centros sanitarios.
Feijóo destacou a importancia deste centro para a colectividade galega e os miles de mutualistas ligados ao mesmo, á vez que se remitiu ás palabras de Lacalle. "Casa de Galicia ten que ser Casa de Galicia", esgrimiu o presidente galego.
Non en balde, incidiu en que había dúas opcións: a fusión con outras entidades sanitarias ou intervir temporalmente para sanear e logo devolver a "vida autónoma" á institución. "O Goberno uruguaio optou pola segunda e eu agradézoo, manter Casa de Galicia como hospital independente para proseguir a súa actividade como entidade asistencial para o futuro", aseverou.
Feijóo, quen xa lembrou que non se trata da primeira intervención, referiuse á difícil situación da entidade, antes de remarcar que "se os hospitais galegos tivesen a personalidade xurídica que ten Casa de Galicia, tamén terían que ser intervidos". Finalmente, asegurou que a Xunta se mantén en contacto co Goberno uruguaio para seguir a evolución da situación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.