O Goberno acata o fallo do Supremo sobre Audasa, sen renunciar á reclamación á Xunta

A Secretaría de Estado de Transportes manifestou que acata o fallo do Tribunal Supremo que deu de novo a razón a Audasa, despois de declarar nunha sentenza previa que o Goberno central debía abonar á concesionaria os case 14 millóns que deixou de cobrar desde 2017.

Este diñeiro deixouno de percibir ao decidir o Executivo de Mariano Rajoy baixar á metade a compensación pola supresión das peaxes de Rande e A Barcala, na AP-9.

"Como non pode ser doutra maneira", dixeron sobre a decisión do Supremo, pero precisando que isto non supón "renunciar á reclamación que temos coa Xunta", engadiron en alusión ao procedemento contencioso-administrativo para esixir á Administración galega que pague 25,44 millóns de euros a Audasa a conta das peaxes de Rande e A Barcala.

Este pronunciamento fixérono público coincidindo coa visita que a secretaria de Estado de Transportes, Isabel Pardo de Vera fixo este venres a Galicia, onde expuxo tamén o posicionamento estatal a este respecto.