Sindicatos estiman que o Sergas necesita "o 100% e máis" do persoal contratado pola pandemia

Sindicatos estiman que o Servizo Galego de Saúde (Sergas) necesita manter o "100%" do persoal contratado pola pandemia da Covid-19 (os últimos 700 acaban contrato entre novembro e decembro) "e máis" traballadores, porque "faltan" no sistema sanitario.

Así o manifestaron representantes sindicais despois de que o presidente da Xunta, Alberto Núñez Feijóo, ratificase esta semana no Parlamento galego o obxectivo de "manter o 80%" do persoal contratado pola crise da Covid "unha vez finalizada a pandemia".

Por parte de CIG-Saúde, María Xosé Abuín, manifestou que "debe de quedar o que se necesita, que é o 100% ou máis", á vez que pregunta "por que rebaixan o 20% cando a asistencia se incrementa".

"Por que o 80 por cento? Cal é a análise do cadro que permite que quede ese 80%?", cuestionou, para lembrar que, ademais, "hai unha débeda de días importante do persoal" que teñen pendentes de librar e que, en casos, denéganselles por necesidade de servizo. "Algún suspende o contrato para poder descansar", advirte.

Nesta liña, por parte de UGT, Javier Martínez manifestou que "fai falla persoal agora mesmo, non soamente cando hai pandemia" e incidiu en que iso se reflicte en que "hai listas de espera en Atención Primaria".

Por iso, insiste en que "fóra de pandemia as debilidades e penosidades que se lle achacaron" a esta "seguen aí", no sistema sanitario galego. "Fai falta este persoal e máis", recalcou en relación aos contratados pola crise sanitaria debida á Covid-19.

"Se rebaixas persoal non están a achegar a solución adecuada", sostivo o portavoz de sanidade de UGT en Galicia, quen considera que "agora tería que crecer o persoal". Ademais, lembrou que existe "déficit de persoal desde 2014".

En relación á afirmación da directora de Recursos Humanos, Ana Comesaña, de que a poboación de Galicia diminúe mentres que aumenta o persoal, Martínez considérao "un razoamento desafortunado que non ten nada que ver". Por iso, subliña que o persoal "ten que estar relacionado coa demanda, non só cos índices de mortalidade".

Por iso, apuntou que a necesidade de persoal "mídese por servizos, por coidados e benestar", polo que considera que "non é xustificado" que soamente manteñan ese 80 por cento. "Se queres benestar non podemos falar do 80%, senón de cifras superiores do 100%", sentenciou.

Tamén o responsable de sanidade en Comisións Obreiras, Javier González, lamentou que por parte do Sergas non se sinale "que tipo de contratación e para que" quedará ese persoal contratado para afrontar a atención na pandemia.

Con todo, afirmou que "o esperado" era que "fose enfermaría" o groso de persoal que quedase unha vez finalicen os contratos pola pandemia. "O ideal é que fose todo, porque falta persoal", remarcou

Por parte do Sindicato de Enfermaría (Satse), Lourdes Carbajo, sinalou que "se das 750 enfermeiras" con contrato pola pandemia queda o 80%, "non van estar perfectamente" porque "o déficit de enfermeiras segue existindo". "Isto está crítico", concluíu.

Para Satse fan falla máis de 5.900 enfermeiras no Sergas, segundo estimacións realizadas antes da pandemia pola Covid, delas unhas 2.600 na provincia de Pontevedra, 2.070 na da Coruña; unhas 790 na de Ourense e unhas 430 na de Lugo.

Respecto diso, explican que Galicia conta con 3,8 enfermeiras por mil habitantes, o que a sitúa no número 13 das 17 comunidades con menor cociente, mentres a media estatal ascende a 5,3.