A "imparcialidade" do alto cargo nomeado a dedo por Feijóo que apoia os movementos da Xunta

O presidente do Consello Consultivo, José Luís Costa Pillado, defendeu a imparcialidade do órgano que encabeza fronte ás acusacións dos grupos da oposición en Galicia, que consideran que os informes que emite o organismo consultivo son empregados pola Xunta para referendar as súas decisións políticas. Todo isto a pesar de ter sido nomeado pola propia Xunta de Galicia hai menos dun ano. Antes xa pasara polo órgano, pero unha imputación na Cóndor --finalmente sobreseída-- apartouno do cargo.

Pillado estivo este mércores no Parlamento galego para presentar as contas do Consello Consultivo nunha mañá na que tamén foi a quenda do presidente do Consello Económico Social (CES). Tanto o Consultivo como o CES apenas presentan variacións de cara ao próximo ano nas súas contas, con pequenos axustes no capítulo de salarios para adaptar a subida retributiva dos empregados públicos en 2022.

Os orzamentos destes organismos, segundo explicaron os seus titulares Agustín Hernández (CES) e José Luís Costa Pillado (Consultivo), ascenden a un total de 1,4 e 2,7 millóns de euros, respectivamente. Os presidentes de CES e Consultivo pasaron na mañá deste mércores pola Comisión 3ª da Cámara autonómica, no marco da rolda de presentación dos orzamentos da Xunta para 2022 coa que se inicia a súa tramitación parlamentaria.

CRÍTICAS DA OPOSICIÓN

Durante a quenda dos grupos, a oposición, BNG e PSdeG, puxeron o foco no papel que xoga o Consultivo galego, xa que entenden que o seu funcionamento se orienta a referendar desde a perspectiva xurídica as decisións políticas do Goberno galego. Así o expuxeron tanto o deputado socialista Pablo Arangüena como o nacionalista Luís Bará, que mostraron os seus receos ante a falta de publicidade dos informes que elabora o Consello Consultivo.

"É facultade exlusiva do Consello emitir estes informes de carácter xurídico, que moita xente pensa que son para avalar as decisións da Xunta. Sempre lle dan a razón e son os únicos que poden emitilos", aseverou Arangüena. Nesta liña manifestouse tamén Luís Bará, que puxo como exemplo o informe feito polo Consultivo sobre a posibilidade de adscribir ao porto de Marín os terreos onde se sitúa a planta de Ence.

Para Bará, a conclusión positiva respecto diso do Consultivo, trasladada publicamente polo presidente da Xunta, Alberto Núñez Feijóo; é "un exemplo de libro" da "manipulación da interpretación" das actuacións do órgano, o que supón "un menoscabo da imaxe e o presitigio da institución". Tras o peche da quenda dos grupos políticos por parte da deputada popular Paula Prado, que acusou á oposición de "tentar sacar réditos políticos" da comparecencia; Costa Pillado defendeu a imparcialidade do órgano que preside.