Critican a "falta de aposta pola integración" de Formoso, que "opta por purgar" no PSdeG

O secretario de Acción Electoral da executiva saínte de Gonzalo Caballero e deputado autonómico, Martín Seco, criticou a "falta de aposta pola integración" do novo secretario xeral electo, Valentín González Formoso. Así o sinala despois de coñecerse que a dirección Federal do PSOE destituíu o Comité Organizador do XIV Congreso do PSdeG que fora designado baixo a dirección de Gonzalo Caballero para nomear unha nova comisión proposta polo novo líder da formación, un feito que, na súa opinión, mostra a "nula veracidade" do discurso de integración co que o presidente da Deputación da Coruña se presentou ás primarias.

Martín Seco, que formou parte do equipo da candidatura de Gonzalo Caballero no proceso interno, sinalou que Formoso "opta por restar e purgar no canto de sumar" e sostén que o novo secretario xeral electo "empeza mal se purga aos compañeiros elixidos polo Comité Nacional Galego, máximo órgano do partido en Galicia para organizar o Congreso".

Seco trasladou o seu "respecto" pola resolución federal, pero considera que Formoso "erra politicamente ao non comunicar a súa posición á executiva galega, cuxo mandato está vixente ata o congreso, a pesar da boa disposición galega en funcións a colaborar" co seu equipo.

Como proba diso, Seco citou un correo enviado o pasado día 5 de novembro pola comisión organizadora destituída a Formoso para "porse á súa disposición para calquera indicación, orientación global ou texto, así como para a incorporación de relatores ou material" de cara á "finalización do relatorio marco que está a ser redactada, ou o feito de que o propio Gonzalo Caballero lle trasladase esta mesma disposición en persoa".

"A nosa estratexia é contribuír entre todos e todas para facer o mellor traballo posible para a nova etapa, pero parece que algúns só entenden a integración de boca para fóra", reprobou Martín Seco, que lamenta que "algúns sigan na estratexia de menoscabar o partido con filtracións interesadas".

Por último, lembrou a Formoso que "agora xa non ten que seguir facendo oposición a Gonzalo Caballero", senón que é necesario que "empece a traballar en clave colectiva". "Este modo tan revanchista de actuar cos compañeiros e compañeiras vai na liña completamente oposta á de unir o partido para seguir fortalecendo o proxecto socialista en Galicia", finaliza.