Os novos contaxios volven aumentar: Galicia roza xa os 800 casos de Covid
A taxa de positividade ascende ao 2,19% e seguen 39 pacientes hospitalizados por este coronavirus.
Por Europa Press / Redacción | SANTIAGO DE COMPOSTELA | 09/11/2021 | Actualizada ás 11:02
Os novos contaxios de Covid-19 ascenden a 74 e os casos activos aumentan a 798 no conxunto da Comunidade galega, que supoñen 53 máis que a xornada anterior e 268 máis que hai unha semana, mentres que 39 pacientes continúan hospitalizados por este coronavirus. Pola súa banda, a taxa de positividade sobe ao 2,19 por cento.
Segundo os datos publicados na mañá deste martes pola Consellería de Sanidade con rexistros ata as 18,00 horas deste luns, ascenden a 10 as persoas ingresadas en UCI pola Covid --unha máis--, mentres descenden a 29 as hospitalizadas noutras unidades --unha menos--, e 759 pacientes atópanse en seguimento no seu domicilio.
Por áreas sanitarias a presión hospitalaria aumenta nas de Ourense, Santiago-Barbanza e Pontevedra-O Salnés, mentres que se alivia nas da Coruña-Cee, Lugo e Ferrol, e mantense sen cambios nas de Vigo, que segue con dous pacientes Covid en UCI e dúas noutras unidades.
No caso da área de Ourense aumentan a dúas os pacientes ingresados pola Covid en críticos --un máis-- e a oito os que se atopan noutras unidades --un máis--, mentres que na de Santiago e Barbanza segue un en UCI e soben a cinco os doutras unidades --un máis--.
A área de Pontevedra e O Salnés, que levaba varias xornadas sen ingresados por este coronavirus, conta cun en planta. Por contra, na de Lugo segue un en UCI e queda un noutra unidade --un menos--.
A área da Coruña e Cee mantén dous hospitalizados pola Covid en UCI e rexistra nove noutras unidades --dúas menos--, mentres que na de Ferrol continúan dúas en críticos e baixan a tres os doutras unidades --un menos--.
AUMENTAN OS CASOS
Por novena xornada consecutiva os casos activos de Covid-19 aumentan en Galicia ata situarse nos 798, que representan 53 máis que o día pasado ao haber máis contaxios (74), que altas (19), ao que se engaden dous falecementos. Iso supón 268 infeccións activas máis que hai unha semana.
As infeccións activas ascenden nas sete áreas sanitarias galegas, coa de Vigo á cabeza (+15), seguida das de Ourense (+11), Lugo (+9), Ferrol (+6), Santiago e Barbanza (+6), A Coruña e Cee (+5), e Pontevedra e O Salnés (+1).
Por tanto, a área da Coruña e Cee continúa á cabeza con 200 casos activos; seguida de Ourense con 195; Vigo, con 116; Ferrol, con 80; Santiago e Barbanza, con 72; Pontevedra e O Salnés, con 70; e á cola mantense Lugo, con 65.
Segundo os datos actualizados na tarde deste pasado luns polo Ministerio de Sanidade, Galicia conta cunha taxa a 14 días de 28,68 casos por 100.000 habitantes, mentres que a media de España ascende a 58,57.
CONTAXIOS EN ASCENSO
Pola súa banda, os novos contaxios de Covid repuntan a 74 no conxunto de Galicia, que supoñen 20 máis que no inicio desta semana, mentres que sete días atrás reducíanse a 27. Ata o momento, o luns 11 de outubro rexistráronse 14, a cifra máis baixa desde que Galicia entrou en niveis de 'nova normalidade'.
Galicia confirmou 76 positivos por probas diagnóstica de infección activa nas últimas 24 horas --algúns poden corresponder a persoas xa contaxiadas que voltan a dar positivo--, dos cales 17 corresponden á área de Vigo; 16, á de Ourense; 13, á da Coruña e Cee; 11, á de Lugo; sete, á de Santiago e Barbanza; sete, á de Ferrol; e cinco, á de Pontevedra e O Salnés.
Deste xeito, as persoas contaxiadas en Galicia desde o inicio desta pandemia aumentan a 183.769, das que 43.429 corresponden á área da Coruña e Cee; 37.855, á de Vigo; 27.149, á de Santiago e Barbanza; 21.996, á de Ourense; 21.555, á de Pontevedra e O Salnés; 20.056, á de Lugo; e 11.729 á de Ferrol.
Segundo os datos actualizados por Sanidade, desde o comezo desta crise sanitaria realizáronse 2.915.661 PCR en Galicia, que supoñen 2.030 probas máis que as contabiliazdas ata o día anterior, que implican unhas 177 menos que as feitas o día anterior.
En canto á taxa de positividade das probas PCR --número de infeccións detectadas cada 100 test--, ascende ao 2,19 por cento, tras arrincar esta semana cunha caída ao 1,56 por cento.
VÍTIMAS E CURADOS
As persoas falecidas diagnosticadas con Covid-19 desde o inicio desta pandemia en Galicia ascenden a 2.655, despois de notificar este luns a Consellería de Sanidade dous novos óbitos.
En concreto, morreu un home de 88 anos no Complexo Hospitalario Universitario de Ourense e unha muller de 84 no Complexo Hospitalario Universitario A Coruña. Ambos presentaban patoloxías previas.
Fronte a iso, 180.350 persoas diagnosticadas deste coronavirus curáronse na Comunidade galega desde o inicio desta crise sanitaria, que implican 19 máis que as contabilizadas ata o día anterior.
