A receita da Xunta para a sanidade: 64 prazas novas para un déficit de 5.000 médicos

A Consellería de Sanidade remitiu ao Ministerio de Sanidade a documentación das solicitudes para 64 novas prazas de formación de Medicina Familiar e Comunitario, que pasan de 142 a 206, o que supón un incremento do 45 por cento.

Así o informou o conselleiro de Sanidade, Julio García Comesaña, en resposta a unha interpelación do grupo do BNG no pleno do Parlamento galego sobre medidas para paliar a situación da Atención Primaria en Galicia. Respecto desas prazas, puntualizou que a Xunta solicitou que estas novas se incorporen xa nesta convocatoria para enfrontar o déficit de profesionais neste nivel asistencial.

Comesaña indicou que esperan a que o Ministerio de Sanidade atenda a petición da Comunidade galega, o que permitiría "acurtar os tempos" para paliar ese déficit de persoal que, lembrou, representa un problema en todo o Estado. A deputada do BNG Montse Prado, autora da interpelación, reprochou no pleno "12 anos de populismo" e de "xestionar con titulares e non con medidas reais". Tras insistir en que "a poboación non aguanta máis" e o persoal tampouco pola "sobrecarga", denunciou a "rebaixa de dous millóns" en Atención Primaria para o próximo ano no presupostos autonómicos.

Tamén lle reprochou ao conselleiro que non renoven "todos" os contratos do persoal contratado pola pandemia pola Covid-19. "Segue habendo moitísima carga de traballo e non renovan eses contratos. É necesito o 100% dos contratos e aínda máis", abundou. "A este ritmo estamos a un paso dun colapso xeneralizado", avisou.

MEDIDAS

Fronte a iso, o titular de Sanidade reivindicou os "avances" para paliar a situación da Atención Primaria. "Teñen a estratexia do desprestixio e da alarma e nós achegamos un novo modelo de Atención Primaria", defendeu ante as críticas do BNG. Neste sentido, incidiu en que a Xunta impulsa accións "para paliar o déficit de persoal" en Atención Primaria, entre as que lembrou a posibilidade de prolongar o servizo de médicos con idade de xubilación, aos que agradeceu o seu esforzo.

O conselleiro de Sanidade, Julio García Comesaña, comparece ante a Comisión 3ª de Economía, Facenda e Orzamentos para explicar os orzamentos do seu departamento para o próximo ano.. XOÁN CRESPO